Read Falam Chin SAAM HLABU 41 Bible Online

SAAM HLABU 41 - Falam Chin bible

SAAM HLABU 41

¹[35] Mi farah pawl zawnruattu cu mi thlawsuak an si, An harsat caan ah BAWIPA in a bawm ding.

²BAWIPA in a kilkhawi ding ih a nunnak a humhim ding; Hi ram sungah hin mi lungawi a siter ding; A ral pawl ih kut sungah a taanta lo ding.

³A nat tikah BAWIPA in a bawm ding ih a damter sal ding.

⁴Cule BAWIPA ih hnenah, “Maw BAWIPA, na parah ka sual zo. I zaangfah hram awla i damter hram aw,” ka ti.

⁵Ka ral pawl in in nahsiik ih in ṭongsanmi cu a sia ngaingai. “Ziangtikah so a thih ding ih, A hmin a hlohta ding cu?” in ti.

⁶I ra vehtu pawl cu thinlung tak in a rami an si lo. Ka parih thusia lawnglawng an hawl ih an kir sal tikah khawzakip ah in rel.

⁷I huatu pawl cun ka thu hlir thuthup ah an rel. Ka hrangih a sia pittawp tiangin an ruat.

⁸Annih in, “Besiazet in a na ih, A ihkhun ihsin a tho nawn zik lo,” in ti.

⁹Ka rualpi ṭha bik, ka rinsan bikmi le ka rawl i ṭawmtu rori in i phiarsawm zo.

¹⁰Maw BAWIPA, i zaangfah awla i damter hram aw; Ka ral pawl ka lehrul theinak dingah.

¹¹Ka ral pawl ih in neh lo a si ahcun, Ka parah na lung a awi a si, ti ka thei ding.

¹²A dikmi ka tuah ruangah nangmah in i bawm ding; Na hnenah kumkhua in i umter ding.

¹³BAWIPA, Israel ih Pathian cu thangṭhat uh. Amah cu atu le kumkhua in thangṭhat uh. Amen, Amen.