Read Falam Chin SAAM HLABU 42 Bible Online

SAAM HLABU 42 - Falam Chin bible

SAAM HLABU 42

¹[36] Zukneng in zo tidai a ngai duahdo vekin, Maw Pathian, nangmah cu ka lo ngai a si.

²Maw Pathian, a nungmi Pathian, Ka nunnak in nangmah cu tidai bangin a lo haal a si. Ziangtikah so na hnen ka thlen ih, Na mithmai ka hmuh ding?

³A sun a zan in ka ṭap ih, Mitthli lawng hi ka rawl a si. Ka ral pawl in, “Khui-ah so na Pathian cu a um?” tiah cat loin in sut.

⁴A cem ciami tikcu ka ruah sal tikah ka lung a kuai ṭheu. Mi senpi thawn Pathian inn ih kan rak feh ṭheu kha; Cutiih kan feh tikah keimah cu an hruaitu ka rak si; Lungawi aipuang in, au phah le Pathian thangṭhatnak hla sak phah in kan rak feh kha!

⁵Ziangah so hi tluk lawmmam in ka riah a siat? Ziangah so hi tluk lawmmam in ka thinlung a bang? Asinain ka ruahsanmi cu Pathian lawng a si. Amah cu ka thangṭhat sal ding; I Runtu le ka Pathian cu!

⁶Kan saltaannak hmun ah ka lung a kuai ṭheh zik thlang; Jordan ram in le Hermon le Mizar Tlang kiang ihsin Amah cu ka ciing ding.

⁷Tipithuanthum thuk in ti thuk dang a ko; Riahsiatnak cu ka nunnak sungah tisuar bangin le tilik bangin an ra thleng. Riahsiatnak tisuar an bang.

⁸BAWIPA in nitinte in in duhdawtnak langter hram seh. Zan ah a hla cu ka thinlung ah a caam. Ka nunnak Pathian hnenah thla ka cam ding.

⁹Pathian, i ṭantu ka lungpi hnenah, “Ziangah so i hngilh zo? Ziang hrangah so ka ral pawl ih in tisiatnak cu ka tuar rero hrih ding?” tiah ka ti.

¹⁰In ṭongsannak cu ka hrangah hma hnaikhuar bangin a na; Cat bang loin, “Na Pathian cu khui-ah so a um?” in ti.

¹¹Ziangah so hitluk lawmmam in ka riah a siat? Ziangah so hitluk lawmmam in ka thinlung a bang? Asinain ka ruahsanmi cu Pathian lawng a si. Amah cu ka thangṭhat sal ding. I Runtu le ka Pathian cu!