Read Falam Chin SAAM HLABU 44 Bible Online

SAAM HLABU 44 - Falam Chin bible

SAAM HLABU 44

¹[37] Maw Pathian, kan hna in kan thei zo, Kan pu le kan pa pawl in in sim zo; Khuahlan laiih thil mangbangza na tuahmi pawl cu!

²Nangmah in Pathian thei lo pawl na dawi ih, Na minung pawl hi ram luahtu ah na tuahnak cu! Miphun dang pawl cu na hrem hai naón, Na minung pawl cu mi neinung ih na tuahnak pawl cu!

³Na miphun pawl in hi ram cu an ralnam in an neh a si lo; An cahnak in an neh khal a si lo. Na vorhlam ban thacak le huham, an hnenih na um ringringnak le, Na duhdawtnak an hnenih na langternak in an neh a si.

⁴Nangmah cu ka siangpahrang le ka Pathian na si. Na minung hnenah ral nehnak na pe.

⁵Na huham in kan ral pawl cu kan neh; Na hmin in in dotu pawl leilung ah kan palcih.

⁶Ka li hi ka rinsan lo; Ka ralnam khal hi i run theitu a si lo.

⁷Kan ral pawl ih kut ihsin in hum zo ih, In huatu pawl na neh hai a si.

⁸Nangmah cu kan lo thangṭhat ding ih, Kumkhua in kan lo cawimawi ding.

⁹Sikhalsehla maw Pathian, Nangmah in in hnong ih kan ral in in neh sal zo. Kan ralkap bu pawl hnenah na feh nawn lo.

¹⁰Kan ral pawl hmai ihsin in tlanter zo, Kan ral in kan thilri pawl in long ṭheh zo.

¹¹Tuu vekih thah thluh dingah in siang zo; Ram dangdang ah in ṭhekdarh thluh zo a si.

¹²Na minung pawl na zuar hai ih An man na ngenmi cu zianghman reltlak a si lo. Na zuarmi man in zianghman hlawknak na ngah fawn lo.

¹³Kan parih na thil tuah mi hi kan kiangkap pawl in an hmuh tikah, In hmuhsuam ih in hnihsan.

¹⁴Miphun tampi lakah nautat phun ah kan cang; Nautat hmuhsuamnak thawn an lu in suthnawh ciamco.

¹⁵In duh lotu le ka ral pawl Hmuhsuamnak le relsiatnak ka theih ruangah,

¹⁶Ningzahnak in puan bangin i khuh ih, Mualpho in ka um ringring a si.

¹⁷Nangmah cu kan lo hngilh lo ih Kanmah thawn na thukamnak tla kan balsiat lo naón, Hi bangtuk thil hi kan parah a thleng.

¹⁸Kan thinlung hi a zuangzam dah lo; Kan ke khal na lamzin ihsin an pial dah lo.

¹⁹Asinain zohman bawmtu nei loin ramsa lakah in taanta ih, Thihnak khawthim sungah in hlonta a si.

²⁰Kan Pathian biak kan cawl ih Ram dang khawzing hnenah thla kan cam sibang sehla,

²¹Nangmah in in thei thluh zo ding a si; Ziangahtile nang cu minung ih Ruahnak thup tla a thei ṭhehtu na si.

²²Sikhalsehla nangmah ih ruangah Sun nihlawh thah tuar rero in kan um; Thah dingmi tuu tlukih ruah mi kan si.

²³Maw BAWIPA, ṭhang thlang aw! Ziangah so na ih ringring? Tho thlang aw! Kumkhua cun in taanta hram hlah aw.

²⁴Ziangah so kan hnen ihsin na relh ringring? Kan harsatnak le kan tuarnak hi in hngilh sak hlah aw.

²⁵Lei parih palcih mi kan si; Ral in in neh ih leivut lakah in thluk.

²⁶Tho awla in bawm aw. A hmunmi in duhdawt ruangah in run hram aw.