Read Falam Chin SAAM HLABU 45 Bible Online

SAAM HLABU 45 - Falam Chin bible

SAAM HLABU 45

¹[38] Ka thinlung cu ṭongṭha le ṭongmawi in a khat, Siangpahrang hrangih hi hla ka phuah tikah hin, Ka lei cu cangan thiam pa ih cafung bangtuk a si.

²Nang cu mipa hmuahhmuah lakah a piangbik na si, Na hmurka khal a thlum bik; Pathian in a lo thlawsuah a si.

³Maw siangpahrang bawipa, na taai ah na ralnam thlaih aw; Nang cu huham nei le mi sunglawi na si.

⁴Thudik le dingnak ṭan in, Mi dang hnakin a cuang in nehnak lamzin ah feh aw. Na ban thacak in nehnak tampi a lo pe ding.

⁵Na conkiang an hriam ngaingai; Na ral pawl ih thinhna a suntlang a si. Miphun tampi cu na ke hramah an tlu ding.

⁶Pathian ih a lo pekmi siangpahrang tokham cu, Kumkhua in kumkhua tiang a hmun ding. Na uknak cu lal kianghrol thawn dingtein na uk a si.

⁷A ṭhami cu na duh ih a ṭha lomi cu na hua; Curuangah BAWIPA na Pathian in a lo hril zo ih, Siangpahrang dang hmuahhmuah hnakin na parah lungawinak hriak cu a burh zo a si.

⁸Na hnipuan tla cu myrr rimhmui, aloes rimhmui le kassia rimhmui pawl hnih mi an si ih an hmui vurvo. Vuiho ih cermi siangpahrang inn ah hlathiam pawl in awnmawi thawn an lo nompi a si.

⁹Na umnak innpi sungih a ummi nunau pawl cu Siangpahrang fanu an si. Na siangpahrang tokham ih vorhlam kap ah Ofir sui ṭha bik hlawnthil a hruktu Siangpahrang bawinu a um.

¹⁰Maw siangpahrang ih fala, Ka sim mi hi i thei sak hram aw: Na minung le na sungkhat pawl hngilh ta aw.

¹¹Na mawi ruangah siangpahrang in a lo hahio ding. Na bawipa a si ih amah ih thu cu na ngai pei.

¹²Ṭai-ar khua nunau pawl in laksawng an lo pe ding. Mi lian pawl in nangmah ih tlaihsan duh ah paisa an hmang ding.

¹³Siangpahrang fanu cu siangpahrang inn sungah a um. Fala mawizet a si! A hnipuan cu sui pat ih tahmi a si.

¹⁴A hnipuan a mawi zetmi sin in siangpahrang hnenah an fehpi, Amah kilkhawitu nunau pawl in an thlun ih, Annih khal cu bawipa ih hnenah an fehpi.

¹⁵Lungawi aipuang in an feh ih Siangpahrang inn sungah an lut.

¹⁶Maw ka siangpahrang, fapa tampi na nei ding ih, Na pu le na pa ih ai-awhtu an si ding. Cule leilung pumpi uktu ah na tuah hai ding.

¹⁷Hi ka hla phuahmi in na hmin cu kumkhua in a nungter ding. Mi hmuahhmuah in nangmah cu Kumkhua in an lo thangṭhat ding.