Read Falam Chin SAAM HLABU 46 Bible Online

SAAM HLABU 46 - Falam Chin bible

SAAM HLABU 46

¹[39] Pathian cu kan beunak le kan thazaang a si; Harsat caan ah cat loih in bawmtu a si.

²Curuangah zianghman kan ṭih lo ding; Leilung pi a hnin ṭheh ih, Tipithuanthum thuuk sungah tlangsaang pawl an cim ṭheh ih,

³Tifinriat pawl tilet tho in a huuk ih tlang pawl an hnin an cim hman ah kan ṭih lo ding.

⁴Pathian khawpi sungah le, Cungnungbik ih inn thianghlim sungah lungawinak a rak luanpitu tiva pakhat a um.

⁵Cuih khawpi ah Pathian a um ih Ziangtik hmanah siatsuah a si dah lo ding. Zingthlapit ah cuih khua bawm dingin a ra ding.

⁶Miphun pawl an tuk a sum, Uknak ram pawl an hnin ṭheh; Pathian in a aw a suah ih leilung pumpi cu a ziam ṭheh.

⁷Cungnungbik BAWIPA cu kan hnenah a um. Jakob ih Pathian cu kan beunak lungpi a si.

⁸Ra uh; BAWIPA ih a tuahmi hi zohhnik uh, Leilung tlun ih thil a siatsuah thei zia hi!

⁹Leilung pumpi ah ral a daihter; Li pawl a khiak ṭheh, fei pawl a sattan ṭheh ih, Ralphaw pawl mei in a ur ṭheh.

¹⁰Amah in, “Nan do awknak cu baang thlang uh, Keimah hi Pathian ka si kha thei uh; Miphun hmuahhmuah tlunah bawi bik ka si ih leilung pumpi tlun khal ah bawi bik ka si thotho,” tiah a ti.

¹¹Cungnungbik BAWIPA cu kan hnenah a um. Jakob ih Pathian cu kan beunak lungpi a si.