Read Falam Chin SAAM HLABU 47 Bible Online

SAAM HLABU 47 - Falam Chin bible

SAAM HLABU 47

¹[40] Maw leilung mi pawl, lungawi in nan za beng uh; Pathian cu ring zetin hla in thangṭhat uh.

²BAWIPA, Cungnungbik cu maktara Pathian a si. Amah cu a lian bik siangpahrang a si ih leilung pumpi uktu a si.

³Amah in miphun tampi tlun ah nehnak in pe ih, Miphun tampi uktu ah in tuah.

⁴Kan hrangah kan umnak leiram hi a hril; A duhdawt a minung pawl ih comi, Jakob ih uarmi ram sunglawi cu!

⁵Pathian cu a siangpahrang tokham ah a hung feh. Lungawi ih au thawm le tawtawrawt tum thawm a um, BAWIPA a hung feh tikah cun.

⁶Pathian hnenah thangṭhatnak hla sak uh. Kan siangpahrang hnenah cawimawi- nak hla sak uh.

⁷Pathian cu leilung pumpi tlunah siangpahrang a si. Amah cu hla in thangṭhat uh.

⁸Pathian cu a siangpahrang tokham thianghlim ah a to. Miphun hmuahhmuah a uk ṭheh.

⁹Leilung miphun uktu pawl cu Abraham Pathian ih minung pawl thawn hmunkhat ah an tongkhawm. Raldotu ih ralphaw hmuahhmuah cu Pathian ta an si ṭheh. Amah cu a hleice ih sunloihmi a si.