Read Falam Chin SAAM HLABU 48 Bible Online

SAAM HLABU 48 - Falam Chin bible

SAAM HLABU 48

¹[41] BAWIPA cu a mak ngaingai ih Nasa zetih thangṭhat ding a si. Kan Pathian ih khawpi ah, A tlang thianghlim parah cun!

²Pathian ih tlang, Zion tlang cu A saang ih a mawi zet fawn. Siangpahrang khawpi cu leilung pumpuluk ih lungawinak a si.

³Pathian in cuih khawpi sung, A umnak ralhruang sungah cun, Himnak a um tiah a langter zo.

⁴Siangpahrang pawl hmunkhat ah an tongkhawm aw, Zion Tlang do dingah an ra.

⁵Asinain Zion Tlang an hmuh tikah an mang a bang; An ṭih ih an tlan thluh.

⁶Ṭihnak le phannak in an khat, Nau hring zik nunau bangin.

⁷Pathian in Tarshish lawng tumpi Nisuahlam thlisia hmang in a siatter ṭheh hai bangin.

⁸Ziangkimtithei BAWIPA kan Pathian in a khawpi sungah, thil a tuahmi pawl kan thei zo; Atu-ah kan mit in kan hmu lala. Amah in a khawpi cu kumkhua in a humhim ding.

⁹Maw Pathian, na Biakinn sungah a hmunmi na duhdawtnak hi kan ruat ṭheu.

¹⁰Nangmah cu leilung khawzakip mi in an lo cawimawi ih, Na hmin cu leilung pumpi ah a thang. Dingnak thawn ramkip na uk.

¹¹Zion ih minung pawl an lungawi ko seh. Na ṭhuthennak cu a dik a si. Judah khawpi pawl sungah lungawinak um ko seh.

¹²Zion tlang kimvel in feh uhla zohhnik uh. Ralvennak inn donhleisang pawl cu siarhnik uh.

¹³A phar pawl cu zoh ṭha uhla A ralhruang pawl cu hniksak uh; San thar mino pawl hnenih nan sim dingah.

¹⁴“Hi Pathian cu kumkhua in kumkhua tiang kan Pathian a si. Sanikhuk amah in in hruai ding.”