Read Falam Chin SAAM HLABU 49 Bible Online

SAAM HLABU 49 - Falam Chin bible

SAAM HLABU 49

¹[42] Mi hmuahhmuah in thei uh! Khawzakip ih a um minung pawl,

²Upa nauta le milian farah in Ngaihnik uh.

³Ka ṭongmi cu fimnak ṭongkam a si. Ka ruahnak cu sullam neimi an si.

⁴Phungthluk thu ka ruat ding ih Tingrisit tum phah in a tican ka fianter ding.

⁵Ka ral pawl in in kulh ih ṭihnak can hmanah, Ka thin a phang lo.

⁶An thilri a rinsantu pawl le an lennak a porh ciamco pawl in in kulh hmanah zianghman ka ṭih lo.

⁷Zohman in amah ih nunnak cu a tlen thei lo ding. A nunnak ih man cu Pathian a pe thei lo ding.

⁸Ziangahtile a nunnak ih man cu a khungtuk ih, Thihnak ihsin humhimnak ngah ding le,

⁹Kumkhua nunnak ngah ding ih a pek theimi man hman in a daih lo ding.

¹⁰Zokhal in mifim pawl an thi ih Mi aa le mi-hmuk pawl tla an thi thotho ti an hmu. An zatein an thilri cu an tefa an roh.

¹¹An thlaan cu kumkhua in an inn a si. Cutawkah kumkhua in an um; Hlan ah leiram an rak nei naón!

¹²Minung cu a lennak in thihnak ihsin a hum thei lo ding. Ramsa vekin an hloral ve ding.

¹³Mah le mah a rinsan awzet pawl khi, Ziang an cang ti zohhnik uh! An lennak ih diriam pawl vanduai zia cu!

¹⁴Tuu bangin a thi ding lawng an si, Thih cu anmah khaaltu a si ding. Miding pawl cu anmah nehtu an si ding, Thihnak khua ah an ruangpi a thut ih, An inn ihsin lam hlapi ih an um tik ahcun!

¹⁵Pathian in kei cu i hum ding; Thihnak huham sung ihsin i runsuak ding.

¹⁶Mi pakhatkhat a len vivo tikah le, A lennak cu a karh sinsin tikah na lung sia hlah.

¹⁷A thih tikah zianghman a keng thei lo ding; A lennak in thlaan ah a thlun lo ding.

¹⁸Mi pakhatkhat leilung tlun a nunnak ah hin lungdaihnak a ngah ih a hlawhtlin ruangih an porhzet hman ah,

¹⁹Thihnak a ton tikah cun kumkhua ih khawthimnak hmunah A pu le a pa pawl a vun thlun thotho ding.

²⁰Minung cu a sunlawinak in thihnak ihsin a hum thei lo ding. Ramsa vekin a hloral ve ko ding.