Read Falam Chin SAAM HLABU 50 Bible Online

SAAM HLABU 50 - Falam Chin bible

SAAM HLABU 50

¹[43] Ziangkimtithei Pathian BAWIPA cu a ṭong; Nisuahnak ihsin nitlaknak tiang, leilung pumpi cu a ko.

²Pathian cu Zion ihsin ni bangin a tlang; Mawinak famkim a neitu Zion khawpi cun!

³Kan Pathian cu a ra, a sinan daiteón a ra lo. A hmailam ah mei a alh hluahhlo ding ih, A kimvel ah nasa zetin thlipi a huuk ding.

⁴A minung pawl thu a ṭhen tikah theihpitu ah lei le van a ko ih,

⁵“Thawinak pek tahratin keimah thawn thukamnak a tuahtu ka mithiang pawl cu ka hnenah rak kokhawm hai uh,” a ti.

⁶Van pawl cun Pathian cu a ding, Amah cu thuṭhentu a si, tiah an aupi.

⁷“Maw ka minung pawl, ngai uh, ka ṭong ding. Maw Israel, fiangtein ka lo theiter ding. Keimah hi Pathian, nan Pathian ka si.

⁸Ka hnenih nan pek ringring mi thawinak le mei-urthawinak pawl ruangah ka lo kawk hai a si lo.

⁹Nan inn ihsin nan rak kenmi nan cawcang ka ṭul lo; Nan ṭilva rual lakih nan me pawl khal ka ṭul lo.

¹⁰Ziangahtile hramlak ih ramsa hmuahhmuah ka ta an si ih, Siarcawk lo tlangpar ih ṭilva pawl khal ka ta an si.

¹¹Vate hmuahhmuah le hramlak ih a nungmi hmuahhmuah khal ka ta an si ṭheh.

¹²Ka rilrawng hman sehla nannih ka lo sim hai lo ding; Ziangahtile leilung pumpi le a sung ummi hmuahhmuah hi ka ta an si.

¹³Cawcang sa ka ei mawsi? Me thii ka in mawsi?

¹⁴Nan lungawinak hi Pathian hnen ih nan pekmi thawinak si sawnseh. Cule pek ding tiih nan kam ciami hmuahhmuah cu Ziangkimtithei hnenah pe uh.

¹⁵Harsatnak a thlen tikah keimah i ko uhla ka lo run hai ding ih, Nannih in in thangṭhat ding,” tiah a ti.

¹⁶Asinain mi ṭha lo hnenah Pathian in, “Ka thupekmi cu ziangah so nan saal duh rero? Ka thukam cu ziangah so nan rel duh rero?

¹⁷Nan ziaza rem ding cu nan duh lo ih ka thupekmi pawl cu nan dungtun ṭheh.

¹⁸Fifir nan hmuh tikah a rualpi ah nan cang; ṭaangṭawm sualnak a tuahtu pawl thawn nan kom aw.

¹⁹Ṭong ṭha lo ṭong ding ahcun nan zamrang zet. Thuphan sim ding ahcun nan ṭhukṭhun dah lo.

²⁰Nan unau pawl ih ṭhat lonak hawl le sualpuh ding ahcun tiar cia in nan um ringring.

²¹Hi tluk thil ṭha lo nan tuah naón kei cun zianghman ka ṭong dah lo. Curuangah keimah tla hi nanmah tlukfangah in ruat. Asinain atu cu nun ka lo sim ding, Fiangtein ka lo sim hai ding.

²²Zianghman ah i siar lotu pawl, Hi thu hi ṭhatein ngai uh; Culole ka lo siatsuah thluh hai ding. Zohman runtu nan nei lo ding.

²³Ka hnenih lungawinak nan langtermi hi keimah in upat nan raithawinak a si. Ka thu a thluntu hmuahhmuah cu Ka run hrimhrim ding,” a ti.