Read Falam Chin SAAM HLABU 51 Bible Online

SAAM HLABU 51 - Falam Chin bible

SAAM HLABU 51

¹[44] Maw Pathian, a hmunmi na duhdawtnak ruangah, Kei hi i zaangfah hram aw. Na zaangfahnak a tum ruangah Ka sualnak cu hnawtfai thluh hram aw.

²Ka ṭhat lonak cu kholhfai thluh awla, Ka sualnak ihsin i thiangter hram aw.

³Ka tuah sualmi cu ka thei ih, Ka sualnak cu ka ciing ringring.

⁴Na parah, na par hrimhrim ah, ka sual; Na mithmuh ah thil ṭha lo ka tuah zo. Curuangah thuṭhennak i pekmi cu a dikmi a si; Mimawh ih i ret khal a dikmi a si.

⁵Ka suahthlak in mi ṭha lo ka si, Ka nu ih pum sung ihsin misual ka si zo.

⁶Thutak le thinlung tak cu na duhmi an si. Ka thinlung cu na fimnak in khatter aw.

⁷Ka sualnak hi hyssop thawn fai tein i hlonsak awla mi thiangah ka cang ding. I kholh awla vur hnakin ka vaar sawn ding.

⁸Thinnomnak le lungawinak awkam i theiter hram aw. Cutin na siatsuah ciami ka taksa cu thinnuam le hnangam in a um sal ding.

⁹Ka sualnak zoh duh hlah awla, Ka ṭhat lonak kha i hnawtfai sak thluh aw.

¹⁰Maw Pathian, thinlung thiang ka sungah seemter aw. Ka sungah a thar le a dikmi lungput run ret aw.

¹¹Na umnak ihsin i dawi hram hlah awla, Na thlarau thianghlim cu ka hnen ihsin la hram hlah aw.

¹²Na runnak ihsin a rami thinnomnak cu i pe sal awla, Ka thlarau cu na thu ngaitu siter hram aw.

¹³Cutin misual hnenah na thupek mi cu ka zirh ding ih, Na hnenah an ra kir saal ding.

¹⁴Maw Pathian, i Runtu, ka nunnak cu zuah hram awla, Na dingnak cu lungawi zetin ka aupi ding.

¹⁵Maw BAWIPA, ka hmur run ong awla, Ka kaa in na thangṭhatnak ka phuang ding.

¹⁶Thawinak pekmi cu na duhmi a si lo. Na duh sisehla ka lo pe zo ding. Mei-ur thawinak khal na lungawi mi a si lo.

¹⁷Maw Pathian, ka lo pekmi thawinak cu, A kekkuaimi thinlung a si. A kekkuaimi le sualsir thinlung cu na hnong lo ding.

¹⁸Maw Pathian, Zion parah zaang- fahnak nei awla bawm hram aw. Jerusalem khua kulhnak pawl cu dawl sal hram aw.

¹⁹Cutin thawinak pawl le mei-ur thawinak pawl parah, Na lung a awi ding ih Na biakṭheng parah cawcang pawl cu thawinakah pek an si ding.