Read Falam Chin SAAM HLABU 55 Bible Online

SAAM HLABU 55 - Falam Chin bible

SAAM HLABU 55

¹[48] Maw Pathian, ka thlacamnak hi thei hram awla, Ka lo ngennak hi dungtun hram hlah aw.

²I ngai awla i sawn hram aw. Ka donhar ruangah ka baang zo.

³Ka ral pawl ih in hro ruangah le Mi ṭha lo pawl ih in hmuhsuam ruangah ka bei a dong. Harsatnak ka parah an thlenter. Ka parah an thin a heng ih in hua fawn.

⁴Ṭihnak in ka thinlung cu a khat ih, Thih ṭihnak in i delh a si.

⁵Ṭihphannak le khurhnakin i kai, Tuksum in ka ṭhia thlohthlo.

⁶Aw, thuro bangin thla nei ningla ka va duh so! Ka zam hlo ding ih colhnak ka ngah ding naón.

⁷Hlapi ah ka zam ding ih nelrawn ah umnak inn ka sak ding.

⁸Thlisia ruahpi tuar lo dingah Zamrangte in beunak ka hawl ding.

⁹Maw BAWIPA, ka ral pawl an lung aa ter awla, An ṭong hnokhnaiter thluh aw. Ziangahtile khawpi sungah sual nak le tawh awknak lawng ka hmu.

¹⁰A sun a zan in khawpi kulhnak phar par ihsin khawpi cu an vel, Khawpi cu buainak le tuahmawhnak lawngin a khat.

¹¹Hmunkip ah siatsuahnak lawng lawng a um ih, Khawsung lamzin tla cu huatsuah le bum awknak lawngin a khat.

¹²I zawmtaitu cu ka ral si sehla Ka tuar thei paam ding. I hmuhsuamtu cu i ngaih lotu si sehla ka relhsan mai ding.

¹³Sikhalsehla atu ka ral cu nangmah ka theih mi, Ka hnaṭuanpi le ka rualpi na rak si.

¹⁴Nuam zetin thu kan ruah aw ih Biakinnpi ah misenpi thawn kan feh tlang ṭheu.

¹⁵Rin lopi ah thihnak cu ka ral pawl parah thleng seh; Mithi khua Sheol ah an nungcung in feh hai seh. An innsang sung le an thinlung sungah ṭhat lonak hlir khatseh.

¹⁶Bomnak dil in BAWIPA Pathian ka ko. Amah in i run ding.

¹⁷Ka phunzainak le ka aihramnak cu a hnenah, Zing, sun le zan ah a thleng ih Ka aw cu a thei ding.

¹⁸Ral tampi ka donak hmun ihsin Him damteón i kirpi ding.

¹⁹Kumkhua in uktu bawi a si ringringtu Pathian in, Ka aunak a thei ding ih ka ral pawl cu a neh ding. Annih cun zianghman an tuah thei lo ding. Ziangahtile Amah ṭihzahnak zianghman an nei lo.

²⁰A hlanih ka rualpi in a rualpi pawl a do. A thukam ciami cu a balsiat ṭheh a si.

²¹A kaa cu sahriak hnakin a naal sawn; Asinain a thinlung sungah huatnak a khat. A ṭongkam cu siti hnakin a neem sawn; Asinain ralnam vekin mi a aat.

²²Nan thilrit cu BAWIPA hnenah ṭhum uhla, Nan tha a lo damter ding. Miding cu ziangtik hmanah a rilsawnter dah lo ding.

²³Sikhalsehla maw Pathian, nang cun mi thattu pawl le Thuphanpertu pawl cu an san kauseu hlanah khur thukpi sungah na thlak hai ding. Asinain kei cun nangmah lawng ka lo rinsan a si.