Read Falam Chin SAAM HLABU 56 Bible Online

SAAM HLABU 56 - Falam Chin bible

SAAM HLABU 56

¹[49] Maw Pathian, zaangfahnak ka parah nei hram aw; Ka ral pawl in in do ih cat loin in hrem a si.

²Sun nihlawh in ka ral pawl in in do. Keimah dotu hi an tam ngaingai.

³Ṭihphannak ka neih tikah, Maw Ziangkimtithei BAWIPA, Nangmah ka lo rinsan a si.

⁴Pathian ka ring ih a thukamnak ka thangṭhat. Amah ka rinsan ih zianghman ka ṭih lo ding. Mihring cun ka parah ziangso an tuah thei ding?

⁵Ka ral pawl in sun nihlawh harsatnak in pe. Keimah tuahmawh ding lawng a phunphun in an ruat.

⁶Keimah thah duh ah an relhnak hmunah an tongkhawm aw ih, Ka tuahmi hmuahhmuah in zoh thup ringring.

⁷An ṭhat lonak ruangah, maw Pathian, hrem hai aw. Na thinheng in hlonhlo thluh hai aw.

⁸Ziangtluk in ka thin a baang ti cu na thei. Ka mitthli cu na palang sungah na khum zo. Na cabu sungah na ngan zo a si lo maw?

⁹Nangmah ka lo kawh ni ihsin Ka ral pawl dungah an siip ding. Hi thil pakhat ka thei: Pathian cu keimah lam ah a ṭang.

¹⁰Pathian cu ka rinsan ih a thukamnak ka thangṭhat. BAWIPA ih thukamnak cu ka thangṭhat a si.

¹¹Amah cu ka rinsan ih zianghman ka ṭih lo ding. Mihring cun ka parah ziangso an tuah thei ding?

¹²Maw Pathian, ka lo tiamkam ciami cu ka lo pe ding. Nangmah cawimawinak cu ka raithawinak ai-ah ka lo pe ding.

¹³Ziangahtile thihnak ihsin i luatter ih, Rilhbahnak ihsin i hum zo a si. Curuangah Pathian nangmah ih mithmuh ah ka feh, Nunnak lamzin tleu ah.