Read Falam Chin SAAM HLABU 59 Bible Online

SAAM HLABU 59 - Falam Chin bible

SAAM HLABU 59

¹[52] Ka Pathian, ka ral pawl ih kut sungin i run hram aw. Keimah i dotu pawl ihsin i hum hram aw.

²Hi mi ṭha lo pawl kut ihsin i hum awla, Hi mi thattu pawl kut ihsin i luatter hram aw.

³Zohhnik! Keimah do dingah in bawh. Zaangfah nei lo pawl cu keimah do dingah an tiar aw cia. Sualnak le mawhnak ka neih ruangah a si lo;

⁴Maw BAWIPA, ka sualnak zianghman a um lo naón, Hi bangtuk in an umnak hmun ciar ah an tiar aw cia.

⁵Maw BAWIPA, Ziangkimtithei Pathian, tho awla i ra bawm aw. Israel ih Pathian, nangmahte in zoh ve hnik aw! Ṭhang awla hi pawl hi hrem hai aw. Hi mi ṭha lo mi zuarthlai pawl parah cun Zianghman zaangfahnak nei hlah aw.

⁶Zanlam ah an ra sal, Khawpi sung sukso ah an vak ih, Uico bangin an hngirhngir phahphah.

⁷An ṭongmi hi ngaihnik aw! An lei cu an ka sungah ralnam vek a si. Asinain annih in, “Zoso in thei ding?” an ti.

⁸Asinain maw BAWIPA, nang cun na hnihsan hai. Cubangtuk miphun cu hnihsuahsainak ah na hmang a si.

⁹Maw i ṭantu, na thazaang a si ka rinsan; Maw Pathian, nangmah cu ka beunak lungpi na si.

¹⁰I duhdawtu ka Pathian cu ka hnenah a ra ding. Ka ral pawl an sung cu amah in i hmuhter ding.

¹¹Maw Pathian, that ṭheh hlah aw, Ka minung pawl in an hngilh thluh pang ding. Na cahnak in ṭhekdarh thluh hai awla neh thluh hai aw. In humtu kan BAWIPA!

¹²An hmur ah sualnak a um; An ṭongkam cu sual ṭongkam a si. An puarthaunak ahcun awk-aw hai seh. Mi an cam ih thuphan an per ruangah,

¹³Na thinheng in siatsuah hai aw; Pakhat hman zuah lo in siatsuah thluh hai aw. Cule mi hmuahhmuah in, Israel ram cu Pathian in a uk ih A uknak cu leilung khuazakip ah a thleng ṭheh, ti an thei ding.

¹⁴Ka ral pawl cu zanlam ah an ra kir sal, Uico vekin hngirhngir phah in khawpi sungah an vak.

¹⁵Uico rawl hawl bangin an tawi an vak ih, Ei khop an ngah lo tikah an kio an ai.

¹⁶Sikhalsehla na cahnak cu hla in ka sa ding. Zingtinte a hmunmi na duhdawtnak thu cu ring zetin ka sa ding. Nang cu ka beunak lungpi na si, Ka harsat caanah ka dornak na si.

¹⁷Maw i ṭantu, nangmah ka lo thangṭhat ding. Ka beunak cu Pathian a si; I duhdawtu Pathian cu.