Read Falam Chin SAAM HLABU 60 Bible Online

SAAM HLABU 60 - Falam Chin bible

SAAM HLABU 60

¹[53] Maw Pathian, kannih cu in hnong zo ih in tisiat zo. Kan parah na thin a heng zo; Asinain kan lam hoikir saal hram aw.

²Kan ram hmuahhmuah na hnin thluh ih na saat kuai ṭheh zo. A hma cu damter saal aw, Ziangahtile a tla kuai thluh pang ding.

³Na minung pawl cu harsatnak tamzet na tuarter zo. In ritertu sabit in pe ih kan sawn kan ril.

⁴Nangmah a lo ṭihzahtu pawl hrangah thantaar na thlai sak. An ral pawl kut sung ihsin an luat theinak dingah.

⁵Na cahnak in in run aw. Na duhdawtmi na minung an luat theinak dingah Kan thlacamnak in let hram aw.

⁶A hmunthiang sung ihsin Pathian in “Lungawi zetin Shekhem cu ka ṭhen ding; Sukkoth phairawn cu ka miphun hnenah ka zem ding.

⁷Gilead ram cu ka ta a si, Manasseh khal ka ta a si. Efraim cu ka lukhuh a si; Judah cu ka bawi kianghrol a si.

⁸Asinain Moab ram cu ka kut kholhnak kheng ah ka hmang ding; Edom ramah ka kedam ka hlon ding, Ka ta a si ti theihnak ah. Filistin ram parah neh-nak aw thawn ka au ding,” tiah a ti.

⁹Maw Pathian, ralhruang kulhmi khawpi ah zoso i feh pi ding? Edom ah zoso i hruai ding?

¹⁰In thlauthla ngaingai mawsi? Kan ralkap pawl thawn na feh ve lo ding maw?

¹¹Kan ral in do bawm aw. Ziangahtile milai bomnak cu a lak a si.

¹²Kan hnenih Pathian a ṭan ahcun kan neh ding; Kan ral pawl a neh ding a si.