Read Falam Chin SAAM HLABU 62 Bible Online

SAAM HLABU 62 - Falam Chin bible

SAAM HLABU 62

¹[55] Pathian amah lawng ka nunnak in daitein a hngak; Ka rundamnak cu amah hnen ihsin a ra.

²Amah lawng hi ka lungpi le i runtu a si. I ṭantu cu amah a si ruangah zohman in in neh lo ding.

³Nannih pawl in ziangtik tiangso, Phar bang a sawn zomi le, Hauhruang vekih a tlu zik zomi, Mi pakhat cu nan do hrih ding?

⁴Upat a conak hmun ihsin dirh thlak lawng hi nan duhmi a si. Thuphan rel hi nuam nan ti zet. Nan hmurka cun thlawsuahnak ṭongkam a suak naón, Nan thinlung ngaingai cun nan camriam a si.

⁵Pathian amah lawng ka nunnak in daitein a hngak; Ka ruahsannak cu a hnen lawngah a um.

⁶Amah lawng hi ka lungpi le i runtu a si. I ṭantu amah a si ruangah zohman in in neh lo ding.

⁷Ka rundamnak le ka sunlawinak cu Pathian hnenah a um; Amah cu a cak zetmi i humtu a si ih, Ka beunak lungpi khal a si.

⁸Misenpi pawl, ziangtik khal ah Pathian rinsan ringring uh. Amah cu kan beunak lungpi a si, Nan harnak hmuahhmuah a hnenah sim uh.

⁹Minung cu thawthawt khat vek fang an si; Mitum mite, zianghman an si lo. Cuai ah khai awla zianghman an si zik lo. Thaw hnakin an zaang deuh a si.

¹⁰Thazaang ih mi nehnak rinsan hlah; Ruk ru in ziang khal ngah ding tumtah hlah; Cuti tuah in na len sinsin khal le cupawl cu rinsan duh hlah.

¹¹Voikhat hnakih tam Pathian ih ṭong ka thei zo: Huham hmuahhmuah cu amah ih ta a si;

¹²A mi duhdawtnak cu a thleng aw dah lo. Maw BAWIPA, mi hmuahhmuah cu an ṭuan vekin, An ṭuanman cu nangmah in na pe a si.