Read Falam Chin SAAM HLABU 63 Bible Online

SAAM HLABU 63 - Falam Chin bible

SAAM HLABU 63

¹[56] Maw Pathian, nang cu ka Pathian na si ih nangmah ka lo ngai. Ka nunnak pumpi in nangmah a lo ngai a si. Leiro, leicaar le tidai um lonak leilung in tidai a haal vekin, Ka nunnak in nangmah a lo haal a si.

²Hmun thianghlim ah nangmah ka lo tong ih, Na cahzia le na sunlawi zia ka hmu zo.

³A hmunmi na duhdawtnak cu Nunnak hnakin a sunglawi sawn; Curuangah ka lo thangṭhat ding.

⁴Ka nundam sung hmuahhmuah ah Na hnenih lungawi thusim ka daiter lo ding. Ka kut thlir in na hnenah thla ka cam ding.

⁵Ka nunnak hi rawl thaw ei bangin a tlai zet a si. Nangmah thangṭhatnak hla lungawi in ka sak ding.

⁶Ihkhun tlun ih ka zau tikah nangmah ka lo thei; Zanvar nangmah lawng ka lo ruat.

⁷Ziangahtile nang cu i bawmtu na si ringring; Na thladem hnuai ah lungawi in hla ka sak.

⁸Ka nunnak in nangmah a lo pawk, Na vorhlam kut in i himter.

⁹Keimah thah i tumtu pawl cu Mithi khua ah an vung thleng ding.

¹⁰Raldonak ah ralnam in an thi ding ih, An ruak cu cinghnia in an ei ding.

¹¹Pathian nangmah ruangah siangpahrang a lung a awi ding. Pathian hmin in thukamnak a tuahtu pawl an lung a awi ding. Asinain thuphan reltu pawl ih kaa cu phih an si ding.