Read Falam Chin SAAM HLABU 66 Bible Online

SAAM HLABU 66 - Falam Chin bible

SAAM HLABU 66

¹[59] Leitlun mipawl, Pathian thangṭhat in lungawi in au uh.

²Amah hmin sunloihnak hla sa uh. Sunglawi zetin a hnenah cawimawinak pe uh.

³Pathian hnenah, “Na thil tuahmi pawl hi mangbangza an si, Na huham a nasa tukih na ral pawl hman ṭihnak in na hmaiah an bok.

⁴Leilung mi hmuahhmuah in na hmaiah kuun in an lo biak; Na thangṭhatnak hla an sak. Na hmin cawimawinak hla an sa,” tiah ti uh.

⁵Pathian ih tuahmi hi ra zohhnik uh! Minung lakih a tuahmi mangbangza hi!

⁶Tifinriat cu leilung ro ah a canter; Kan pu kan pa pawl in tivapi cu an ke in an tan; Cutiih a tuah ruangah a parah kan lung a awi.

⁷A cahnak in a uk kumkhua ih Miphun kip a mit in a zoh ringring. Ziangvek ral hman amah dodal in tho hlah hai seh.

⁸Miphun hmuahhmuah pawl, kan Pathian thangṭhat uh. Nan thangṭhatnak cu thang ṭheh seh.

⁹Amah in in nundamter zo ih In bahter sianglo a si.

¹⁰Maw Pathian, in hniksak zo; Ngun cu somei ih an hniksak bangin, Kannih khal in hniksak zo a si.

¹¹Thang an kammi sungah in tlakter ih, Kan zaang parah thilrit ngaingai na suang.

¹²Kan ral pawl ih palcih mi ah in tuah ih, Meisa le tilian lakin kan feh. Asinain atu cu himnak hmun ah in thlenpi zo.

¹³Na inn ah mei-ur thawinak pawl ka rak keng ding; Ka lo kam ciami cu ka lo pe ding.

¹⁴Harsatnak ka ton laiih ka thukammi cu ka kimter ding.

¹⁵Biakṭheng parih ur dingah tuu ka lo pe ding; Mecang urnak rimthaw khal a um ding; Cawcang le mecang pawl thawinak ah ka pe ding; A meikhu cu vanah a kai ding.

¹⁶Pathian a upattu pawl, ra uhla ngai uh; Ka hrangih a thil tuahmi pawl ka lo sim hai ding.

¹⁷A hnenah bomnak dil in ka au. Hla in ka thangṭhat.

¹⁸Ka sualnak hi zianghman poisa loin um ningla, BAWIPA in ka thlacamnak a ngai lo ding.

¹⁹Asinain Pathian in i thei zo; Ka thlacamnak a ngai zo a si.

²⁰Ka thlacamnak a hnong lo ih A hmunmi a duhdawtnak khal ka hnen ihsin a lakkir lo ruangah Pathian cu ka thangṭhat a si.