Read Falam Chin SAAM HLABU 68 Bible Online

SAAM HLABU 68 - Falam Chin bible

SAAM HLABU 68

¹[61] Pathian tho sehla a ral pawl ṭhekdarh seh; Amah a huatu pawl cu tlanhlo thluh hai seh.

²Meikhu cu thli ih a semhlo bangin amah in a semhlo ding; Khuailul cu meisa hmai ih a zup thluh bangin, Mi ṭha lo pawl cu Pathian hmai ahcun siatral thluh hai seh.

³Asinain miding pawl cu a mithmuh ah an lung a awi ding. An lung a awi ngaingai ding a si.

⁴Pathian hnenah hla sak uh; Amah ih hmin thangṭhat uh; Mero parih a totu hrangah lamzin rak sial uh; Amah ih hmin cu BAWIPA a si; A hmai ah nan lungawi uh.

⁵Pathian, a Biakinn thianghlim sungih a umtu cun, Nu le pa nei lo farah zawn a ruatih nuhmei pawl a hum a si.

⁶Inn nei lo lungleng vakvai pawl umnak innsang a pek ih, Thawngtla mi pawl kha lungawiza zalennak ah a hruai. Asinain raltho hmang pawl cu ramcaar lakah an taang ding.

⁷Maw Pathian, na minung pawl na hruaisuak tikah, Nelrawn tan ih na fehpi hai tikah khan,

⁸Leilung a hnin durdo ih van in ruah a run burh; Sinai Pathian, Israel ih Pathian a thlen tikah cun.

⁹Ruah tampi na surter ih, Phuul ram cu na hnawngter sal.

¹⁰Na minung pawl in cutawkah umhmun an khuar; Na ṭhat ruangah mi farah pawl tla na cawm hai.

¹¹BAWIPA in thu a pek ih Nunau tampi in thuthang cu an fehpi ih:

¹²“Siangpahrang pawl le an ralkap pawl an tlanhlo a si,” an ti. Inn ih ummi nunau pawl in thilri lonmi an zem aw.

¹³Ngun ih tuam mi thuro, An thla pawl sui bangin an tleu zohzo. (Ziangah so raldo laiah mi hrek khat tuuhruang sungih nan um men?)

¹⁴Ziangkimtithei Pathian in Zalmon Tlang parah siangpahrang pawl a ṭhekdarh thluh hai tikah Cutawkah vur a tlakter.

¹⁵Maw Bashan tlang, tlangbol tampi neitu tlang lian,

¹⁶Ziangah so Pathian in amah umnak dingih a hrilmi tlang cu na tlangbol par ihsin nautatnak thawn na vun zoh? BAWIPA cu a hrilmi tlang ah kumkhua in a um ding.

¹⁷Rangleeng mak zetzet, siar cawk lo thawng tampi thawn, BAWIPA cu Sinai tlang ihsin hmun thianghlim ah a ra.

¹⁸BAWIPA cu tlangzim ah a hung kai; A ral kaihmi tampi a fehpi. Ral thotu pawl hnenin laksawng tampi a ngah. BAWIPA Pathian cu cunah a um ding.

¹⁹BAWIPA cu thangṭhat si ko seh. Amah in kan thilrit nitinte in a phur; Amah cu in runtu Pathian a si.

²⁰Kan Pathian cu mi runtu Pathian a si; Amah cu BAWIPA a si ih thihnak ihsin in runsuaktu kan Bawipa a si.

²¹Pathian in a ral pawl le, Sualnak lamzin a thlun ringring tu pawl ih lu cu a khuai thluh ding.

²²BAWIPA in, “Nan ral pawl cu Bashan ihsin ka rak hruai ding ih, Tipithuanthum tawne ihsin ka hun suahpi hai ding.

²³Cuticun nan ke cu an thisen ah nan kholh ding ih, Nan uico khal in an duhzat in an liak ding,” tiah a ti.

²⁴Maw Pathian, na feh lai cu mi hmuahhmuah in an hmu; Ka Pathian le ka siangpahrang, a hmunthiang ih feh lai cu!

²⁵Hmaisabik ah hla satu pawl an feh; Dunglam ah awnmawi tumtu pawl an feh; An karlakah khuangte tumtu fala pawl an feh.

²⁶“Pathian cu a minung pawl tonkhawmnak ah thangṭhat uh; BAWIPA cu Israel tesinfa pawl hmuahhmuah in thangṭhat uh,” an ti.

²⁷Hmaisabik ah an hrin lakih fa nauta bik Benjamin mi an ra; Cumi saangtu ah Judah hotu pawl, Anmah ih ho ciar thawn an ra. Cule Zebulun le Naftali hotu pawl in an thlun.

²⁸Maw Pathian, na huham run langter aw; Kanmah hrangih na hmanmi na huham cu!

²⁹Siangpahrang pawl in laksawng an lo peknak, Jerusalem khua na Biakinnpi ihsin run langter aw.

³⁰Phaikung lakih a ummi ramsa vek a si mi Izipt kha kawk awla, Caw note pawl thawn a tlangmi Cawcang rual vek a si mi miphun pawl cu kawk hai aw; Na hmaiah an kun ih an ngun pawl an lo pek hlanlo nun zirh hai aw. Raldo lawnglawng a duhtu pawl cu ṭhekdarh thluh aw.

³¹Izipt ram ihsin thlahmi rampalai pawl an ra ding; Ethiopia mi pawl cun Pathian hnenah ban phar in thlacam an cam ding.

³²Maw leilung tlun ram pawl, Pathian hnenah hla sak uh; BAWIPA hnenah thangṭhatnak hla sak uh;

³³Kumkhua ih a hmunmi van, Cuih van pawl a totu hnen ahcun! Amah ih aw, nasa zetih a aunak aw cu ngai uh.

³⁴Pathian ih huham thangter uh. A makmi a sunlawinak cu Israel parah a um. A cahnak cu vandum ah khin a um.

³⁵A hmunthiang sungah Pathian cu Ziangtluk maktara so a si! Israel ih Pathian cu! Amah ih minung hnenah cahnak le huham a pek. Pathian cu thangṭhat si ko seh.