Read Falam Chin SAAM HLABU 69 Bible Online

SAAM HLABU 69 - Falam Chin bible

SAAM HLABU 69

¹[62] Maw Pathian i run hram aw. Tidai ka hngawng a tiang.

²Cerhduuppi sungah ka pil, Leilung hak zianghman a um lo. Ti thukpi sungah ka um ih Tisuar in i khuh zik thlang.

³Bomnak dil in ka lo kawh-nakah ka tha a cem; Ka dang tla a caar ṭheh; Nangmah ih bomnak hngak in ka zoh-nakah ka mit a kham thluh zo.

⁴Ziangthu hman um loih i huatu pawl cu ka lu par sam hnakin an tam sawn; Thuphanper tahratih ka ral ih a cangtu pawl cu, Mi cak zetzet an si ih a thah lawnglawng in duh. Ka ruk lomi thil pawl tla khirh thluh seh, in ti.

⁵Maw Pathian, ka sualnak pawl cu Na hmai ihsin thuh theih a si lo. Ka aatzia cu nangmah in na thei.

⁶Ziangkimtithei BAWIPA Pathian Cungnungbik, Nangmah a lo rinsantu pawl cu Keimah ih ruangah ningzak in um hlah hai seh. Maw Israel ih Pathian, Nangmah a lo biatu pawl cu, Keimah ih ruangah mualphonak thleng hram hlah hai seh.

⁷Nangmah ih ruangah hmuhsuamnak ka tong ih, Ningzahnak tam ngaipi ka tuar.

⁸Ka unau hnenah mikhual ka bang ih ka sungkhat hnenah mi phun dang ka bang.

⁹Na Biakinnpi ka tlaihsannak cu ka sungah meisa bangin a alh; Nangmah an lo hmuhsuamnak hmuahhmuah cu ka parah an tla ṭheh.

¹⁰Rawl ul tahrat in mi tangdor in ka um; Asinain keimah nautatnak ah a cang.

¹¹Riahsiatnak hnipuan hruk in ka nung; Asinain caponak ah in hmang.

¹²Lamzin ah keimai thu an rel ih, Zuri pawl in hla ah in phuah.

¹³Sikhalsehla kei cun, BAWIPA, na hnenah thla ka cam ding; Maw Pathian, na duhnak tikcu ah i let aw; Ziangahtile na duhdawtnak cu a tum ih, Mi run dingih na thukamnak cu na kimter.

¹⁴Cerhduup sungih pilnak ihsin i run hram aw; Ka ral pawl ihsin i hum awla, Ti thuk sung ihsin i suah hram aw.

¹⁵Tilik cu ka parah thlengter hram hlah aw; A thukmi ih tawne ah i tlater hlah awla, Thlan thukpi sungah i pilter hram hlah aw.

¹⁶Maw BAWIPA, i let hram aw; A hmunmi na duhdawtnak le na ṭhatnak thawn, Na lainatnak a nasat ruangah ka hnenah hoikir sal aw.

¹⁷Kei na siahhlawh hnen ihsin relh hram hlah aw; Harsatnak tumpi ka tong, a tu ah i run let hram aw.

¹⁸Ka hnenah ra awla i hum aw; Ka ral pawl hnen in i runsuak hram aw.

¹⁹In nautat zia cu nangmah in na thei ṭheh ko; Ningzak le thangsia in in tuah zia cu na thei ih, Ka ral pawl hmuahhmuah khal nangmah in na hmu.

²⁰In nautat tuk ruangah ka thinlung a kuai; Bawmtu zohman ka nei lo. Zaangfahnak ka beisei naón khui hmanah a um lo; Hnemtu ka hawl naón khui hmanah ka tong lo.

²¹Ka ril a rawn tikah thihsii in pek, Ka ti a haal tikah sabit thur in pek.

²²An rawl daarmi pawl cu an tluknak ah cang seh; An puai pawl cu an rilhnak ah cang seh.

²³Khua hmu thei lo dingin an mit cawtter aw. Tha nei loin thir thlohthlo hai seh.

²⁴Na thinhengnak cu an parah run burh awla, Na ai-thawhnak in run kaiseh.

²⁵An riah hmun pawl cu taan in ṭhing reprep seh, An riahbuk sungah a nungmi zohman um hlah seh.

²⁶Na vuak thlak ciami pawl an hrem hai ih, Na hliam ciami pawl ih tuarnak thu an rel fawn.

²⁷An sualnak pawl cu hminsin ṭheh awla, Na runnak sungah tel hrimhrim hlah hai seh.

²⁸An hmin pawl cu nunnak cabu sungin phiah sisehla, Na minung pawl ih cazin sungah telhcih sihlah hai seh.

²⁹Asinain kei cu zonzai le natnak tuar in ka um; Maw Pathian, i cawisaang awla i run hram aw.

³⁰Pathian cu hla in ka thangṭhat ding; Lungawinak a hnenah sim in A maksak zia cu ka tlang-aupi ding.

³¹Cumi in BAWIPA cu caw ka pekmi le, Cawcang thawinak hnakin a lung a awiter sawn ding.

³²Mi tlasam pawl in cumi an hmuh tikah an lung a awi ding; Pathian a biatu pawl an tha a tho ding.

³³BAWIPA in mi tlasam pawl ih ṭulnak cu a thei; Thawng sungih a minung pawl a hngilh lo a si.

³⁴Maw lei le van, tipi le a sung ih ummi pawl, Pathian cu thangṭhat uh.

³⁵Zion cu a hum ding ih, Judah khawpi pawl cu a din sal ding. A minung pawl cutawkah an um ding ih cuih ram an luah ding.

³⁶A siahhlawh pawl ih tesinfa pawl in an co ding ih, A mah a duhdawtu pawl cutawkah an um ding.