Read Falam Chin SAAM HLABU 7 Bible Online

SAAM HLABU 7 - Falam Chin bible

SAAM HLABU 7

¹[4] Maw BAWIPA, ka Pathian, nangmah cu ka beunak na si. I duumtu pawl hnenih sin i run awla i hum aw.

²Cuti lo cun zohman ih in run thei nawn lonak hmun ah, Kiosa bangin in thiarhlo ding ih Cutawkah in botthleek thluh ding a si.

³Maw BAWIPA ka Pathian, Mi pakhatkhat parah thil ka ti sual ih,

⁴Ka lamṭang pawl ka phiarsawm ih, A um meenmi ka ral ka tuahmawh a si ahcun,

⁵Ka ral in i dawi in i kai seh; I saat aw sehla i that seh, Ka ruak cu mualpho in leidip lakah taan seh.

⁶Maw BAWIPA, na thinheng in tho aw; Ka ral pawl ih thin ai-thawhnak do dingah ding aw. ṭhang awla i bawm aw, Ziangahtile dingthluk lairelnak thawn thu ṭhen cu na duhmi a si.

⁷Na kiangkap ah mi hmuahhmuah kokhawm awla, Tlunlam ihsin run uk hai aw.

⁸Maw BAWIPA, Nang cu mi hmuahhmuah ih thuṭhentu na si; Curuangah ka felnak le ka ṭhatnak bangin ka thu ṭhen aw.

⁹Nang cu a dingmi Pathian na si, Kan ruahnak le kan duhnak tla thu na ṭhen. Mi ṭha lo pawl ih ṭhat lonak cemter awla, Mi ṭha pawl laksawng pe aw.

¹⁰Pathian cu ka ralphaw a si ih i humtu a si. Amah ih duhnak a thlun tu pawl a humtu a si.

¹¹Pathian cu a dingmi thuṭhentu a si; Mi ṭha lo pawl cu a hnong ringring a si.

¹²Milai pawl an siir awk lo a si ahcun, Pathian in a ralnam a taat ding; A li a nawp ih sai dingah a tiar zo.

¹³A mi thahnak hriamnam pawl a lak ih, A vaam hluahhlomi a conkiang pawl a bih.

¹⁴Zohhnik uh, mi ṭha lo pawl ih thupol mi cu ṭhat lonak lawng a si, Siatsuahnak lawng an ngaihtuah ih Mi bum hlir in khua an sa.

¹⁵Leilung ah khur thuk zet an lai, Cule an laihmi khur sungah anmah riangri an tla.

¹⁶Ṭhat lonak an tuahmi cu an hnenah a thlengkir ih, Mi thisen an suahmi cu an lu parah a thleng sal.

¹⁷BAWIPA cu a dingmi a si ruangah lungawi thu ka sim ding. Cungnungbik BAWIPA ih hnenah Thangṭhatnak hla ka sak ding.