Read Falam Chin SAAM HLABU 72 Bible Online

SAAM HLABU 72 - Falam Chin bible

SAAM HLABU 72

¹[64] Maw Pathian, dingthluk lairel- nak thawn thuṭhentu a sinak dingah nangmah in siangpahrang cu zirh aw. Na dingfelnak coter ve awla,

²Cuticun na minung pawl feltein Thu a ṭhen sak thei ding ih Dingnak thawn namsuk mi pawl a uk thei ding.

³Hi ram in nunnomnak co aw sehla Dingnak a sungah leeng hram seh.

⁴Siangpahrang in mi farah pawl ih thu cu dikte in relseh. Mi tlasam pawl bawm sehla, Mi hmuhsuamtu pawl palcih seh.

⁵Na minung pawl in ni a tlan sung hmuahhmuah le, Thlapi a van sung hmuahhmuah, san mureng tiang, Nangmah lo bia ringring hai seh.

⁶Siangpahrang cu hrampi parih a surmi ruah bangtuk sisehla, Leiram parih a tla mi ruahti bangtuk si hram seh.

⁷A nundam sung hmuahhmuah ah dingnak karhzai sehla, Thlapi a um sung hmuahhmuah ah daihnak um ringring hram seh.

⁸A ram ukmi cu tifinriat in tifinriat tiang; Eufrates Tivapi in leilung netnak tiang a kau ding.

⁹Nelrawn ih minung pawl a hmaiah an kun ding ih, A ral pawl cu leivut lakah an bok ding.

¹⁰Spain ram siangpahrang pawl le Tikulh siangpahrang pawl in laksawng an pe ding. Arabia le Ethiopia siangpahrang pawl khal in siah an pe ding.

¹¹Siangpahrang hmuahhmuah in upatnak thawn, A hmai ah an kuun ding ih Miphun hmuahhmuah in an rian ding.

¹²Amah a kotu mi farah pawl cu a run hai; Mi tlasam le thlauthlakmi pawl khal a hum hai a si.

¹³Mi derdai le mi farah parah zaangfahnak a nei ih, An nunnak a hum hai a si.

¹⁴Hmuhsuamnak le thisen luannak sungin a run; An nunnak cu a hrangah a sunglawi a si.

¹⁵Siangpahrang cu a nunkhua sau hram seh. Arabia ram ih sui a hnenah pek siseh. Cat loin a hrangah thlacamnak um ringring seh; Pathian ih malsawmnak a parah um ringring seh.

¹⁶Hi ram sungah thlairawl tam ngaingai um seh; Tlang pawl cu lorawl in khat seh, Lebanon ih thingrah bangin an rah tamzet seh. Khawpi pawl minung in khat sehla, Hramlak ih hrampi zat si hai seh.

¹⁷A hmin cu ziangtik hmanah hngilh hlah hai seh. Ni a tlan sung hmuahhmuah a hmin thang seh. Miphun hmuahhmuah in amah cu thangṭhat hai seh; Siangpahrang thluasuah a pek ih, Cubangtuk in thluasuah ngah ve dingah midang in Pathian hnenah dil ve hai seh.

¹⁸BAWIPA thangṭhat uh; Israel ih Pathian cu! Amah lawng in hi bangtuk mangbangza a tuah.

¹⁹A hmin sunglawi kumkhua in thangṭhat uh; A sunlawinak leilung pumpi ah khat seh. Amen! Amen!

²⁰Jesse fapa David ih thlacam netnak a si.