Read Falam Chin SAAM HLABU 73 Bible Online

SAAM HLABU 73 - Falam Chin bible

SAAM HLABU 73

¹[65] Pathian cu Israel mi hnenah le Thinlung thiang a neimi pawl hnenah a ṭha a si.

²Asinain kei cu ka tlu zik thlang; Ka ke pawl an naal zik thlang a si.

³Ziangahtile mi hngal pawl khi ka iksiik ih, Mi ṭha lo pawl mi lian ih an can khi ka hmu thei lo.

⁴Annih pawl cu natnak zianghman an tuar lo; An harhdam zetih an cak zet fawn.

⁵Midang tuar zat in an tuar lo; Harsatnak khal midang tlukin an tong fawn lo.

⁶Curuangah an hngalnak cu ṭhi bangin an orh ih, Thazaang ih mi nehnak cu angki bangin an hruk.

⁷An thau tukah an mit a cuur liailiai; An thinlung cu aatnak in a liam hluahhlo.

⁸Mi dang cu caponak ah an hmang ih mi siatnak thu an rel. An hngal zetih mi hmuhsuamnak thu lawng an rel.

⁹Vancung ih Pathian an relsiat ih Leilung tlun minung hnenah hngal zetin thu an pe.

¹⁰Curuangah Pathian ih minung pawl hman an lam an hoi ih, An relmi hmuahhmuah cu lungtho zetin an zum.

¹¹Annih in, “Ziangtin so Pathian in a theih thei ding? Anih Cungnungbik cun theih theinak a nei mawsi?” an ti.

¹²Mi ṭha lo pawl cu hi bangtuk an si ko; Thil tamzet an nei naón tam sinsin neih an duh.

¹³Thianghlim zetin ka um ih ka kut khal sualnak tuah loih an um hi a lak maw a si ṭheh ding?

¹⁴Maw Pathian, sun nihlawh i tuarter zo; Zingtin in hremnak i pek.

¹⁵Cubangtuk cun keimah in rak sim ningla, Na minung pawl zuarthlaitu ah ka cang zo ding.

¹⁶Curuangah hi thu cu thu harzet sihmansehla, Theihthiam ding napi in ka zuam.

¹⁷Cule na Biakinn sungah ka feh, Cutik lawngah mi ṭha lo parah Ziangvek thil a thleng ding, ti ka thei ngah a si.

¹⁸Lamzin naalnak ah annih cu na ret ih, Siatnak sungah na tlakter hai.

¹⁹Hmakhatteah hlohralnak an tong; An cem netnak cu rapthlakza a si.

²⁰Maw BAWIPA, annih cu Zinglam ih a hlo ṭhehmi mang vek an si; Na ṭhang tikah ziang an bang ti hman na ciing nawn lo.

²¹Ka lung a sia ih Ka thin a natzet tikah,

²²Mi aa ka bang ih zianghman ka ruat thei lo; Na hnenah ramsa bangin ka nung.

²³Asinain cat loin na hnenah ka um ih ka kut in i kai.

²⁴Na remruahnak in i hruai ih, A netnak ahcun upat hmin thannak thawn nangmah in i pom ding.

²⁵Vancung ah nangmah siar lo ziangso ka neih? Nangmah ka lo neih hnu ahcun Leilung tlunah ziangso ka hai?

²⁶Ka thinlung le ka taksa hi ṭumsuk deuhdeuh hmansehla, Pathian cu ka cahnak a si. Amah lawng hi kumkhua ih ka covo a si.

²⁷Nangmah a lo dungtuntu pawl cu an thi tengteng ding; Nangmah ah mizuangzam pawl cu Nangmah in na siatsuah ṭheh ding.

²⁸Asinain Pathian kiangih ka um hi ziangtlukinso a ṭhat! A thil tuahmi hmuahhmuah sim le rel dingah, BAWIPA Pathian cu ka beunak ah ka tuah zo.