Read Falam Chin SAAM HLABU 74 Bible Online

SAAM HLABU 74 - Falam Chin bible

SAAM HLABU 74

¹[66] Maw Pathian, ziang ruangah so kannih hi in dungtun? Na tuu pawl kan parah hin kum khua in maw na thin a heng ding?

²Na ta si dingah hlanlaipi ih na rak hrilmi, Na minung pawl hi hngilh hlah aw. Nangmah ih ro na miphun si ding ih na tlenmi pawl cu! Na umnak Zion Tlang cu ciing ringring hram aw.

³Ra awla hi siatsuah thluhmi parah hin ra fehhnik aw; Kan ral pawl in Biakinn sung thilri an siatsuah ṭheh a si.

⁴Na minung pawl na ton ṭheunak na Biakinnpi ah, Na ral pawl an au ciamco, Cutawkah nehnak thantaar an tar.

⁵Anmah tla cu thing hautu pawl an bang, Hreitlung ih thing hautu pawl bangin.

⁶An hreitlung le an nam in zanthing ih tuahmi, sangka le a dangdang an mawiter mi pawl cu, An ceek ih an khuai ṭheh.

⁷Na Biakinnpi cu an bal ih meisa in an ur; Nangmah kan lo biaknak hmun thianghlim an borhhlawhter. Ziang hmuahhmuah an siatbal ṭheh a si.

⁸Kan ci hmih ṭheh in tum. Kan ram sungih hmunthiang hmuahhmuah cu, Meisa in an ur ṭheh a si.

⁹Hminsinnak thianghlim kan neih mi pawl cu an cem; Profet pakhat hman an um nawn lo; Hi vek in ziangtik tiang a si ding ti cu, Zohman ih theih lomi a si.

¹⁰Maw Pathian, ziangtik tiangso kan ral pawl in, Caponak ah an lo hman ding? Na hmin cu kumkhua in maw an relsiat ding?

¹¹Ziangah so in bom duh lo? Ziangah so na kut dunglet na sih?

¹²Asinain BAWIPA, a hramthok ihsin nangmah cu, Kan siangpahrang na si zo; Leilung tlun ah runnak a thlen tertu nangmah na si.

¹³Na thacak in tifinriat cu na ṭhen; Tifinriat ih rulhreng tum zetzet ih lu pawl cu na deen kuai.

¹⁴Leviathan timi rulpi lu pawl na rial dip ih, A sa cu nelrawn ramsa pawl ei dingah na pek.

¹⁵Nangmah in cerhti le tikhur pawl na luanter ih, Tivapi khal na caarter.

¹⁶Nangmah in sun le zan na tuah, Ni le thlapi tla an umnak ciar ah na ret.

¹⁷Nangmah in leilung ih ramri cu na tuah ih, ṭhal caan le khawsik caan khal na tuah a si.

¹⁸Sikhalsehla maw BAWIPA, na ral pawl in, Caponak ih an lo hman cu hngilh hlah aw; Pathian thei lo pawl in na hmin an hmuhsuam a si.

¹⁹Zianghman tithei lo na minung pawl cu, Zaangfah nei lo an ral pawl kut sungah hnong hram hlah aw. Hremnak tuartu na minung pawl hi thei ringring aw.

²⁰Kanmah thawn thukamnak na tuah mi kha thei ringring aw; Hi ram khawthimnak kil kip ah, Nunsiatnak le dodalnak a um.

²¹Hmuhsuamnak le hremnak tuartu pawl cu, Ningzak in umter hai hlah aw. Asinain mi farah le mi tlasam pawl in, Nangmah lo thangṭhat hai seh.

²²Maw Pathian, tho awla na thuhla cu dinpi aw; Pathian thei lotu pawl in sun nihlawh caponak ih an lo hman cu ciing ringring aw.

²³Na ral pawl thinheng ih an aunak le, A lo dodaltu pawl cat loih thawm vang an neih cu hngilh hlah aw.