Read Falam Chin SAAM HLABU 75 Bible Online

SAAM HLABU 75 - Falam Chin bible

SAAM HLABU 75

¹[67] Maw Pathian, na hnenah lungawi thu kan sim; Nangmah hnenah lungawi thu kan sim a si. Na maksak zia cu kan tlang aupi, Mangbangza na tuahmi pawl thu kan sim.

²Pathian in, “Thuṭhennak ni ka tin zo ih, Cuih ni ah diktein thu ka ṭhen ding.

³Leilung le a parih a nungmi hmuahhmuah an sawn ṭheh hmanah, Leilung hramṭohnak pawl cu ka hngetter ding.

⁴Mi hngal pawl porh-aw rero nawn lo dingin ka sim; Mi ṭha lo pawl puarthau lo dingin ka fial.

⁵An porh awknak baang dingah le An hngalnak cawl thlang dingah ka sim hai,” a ti.

⁶Thuṭhennak cu nisuahnak le nitlaknak in siseh, Saklam le thlanglam khal in siseh a ra lo.

⁷Mi thu a ṭhentu Pathian in Mihrek cu a hnong ih Mihrek cu a thlah.

⁸BAWIPA in a kut sungah khuathai a keng; Cuih khuathai cu a thinhengnak sabitti cang in a khat. A thletih mi ṭha lo hmuahhmuah in an in; Neta bik a taangmi forkhat tiangin an in a si.

⁹Sikhalsehla Jakob ih Pathian thu le hla, sim le rel cu ka baang dah lo ding. A hnenih thangṭhatnak hlasak khal ka cawl lo ding.

¹⁰Amah in mi ṭha lo pawl ih ki cu a khiak ding; Asinain miṭha pawl ih ki cu a sauter sinsin ding.