Read Falam Chin SAAM HLABU 76 Bible Online

SAAM HLABU 76 - Falam Chin bible

SAAM HLABU 76

¹[68] Judah ram ah Pathian cu zokhal in an thei ṭheh; Israel ram ahcun a hmin an upat.

²Jerusalem ah inn a nei ih Zion Tlang ah amah a um.

³Cutawkah a ral ih conkiang pawl, Ralphaw le ralnam pawl a khiak; Asi, an hriamnam hmuahhmuah a khiak ṭheh a si.

⁴Maw Pathian, na sunlawi zia hi! Na ral pawl na nehnak tlang ihsin na rakir ih, Na sunlawi zia cu!

⁵An ralkap ralṭha zetzet ih thilri pawl, Lon ṭheh an si tikah cun An itthat ih thihnak ah an it lanta! An hriamnam hmangtu ding pakhat hman an um nawn lo.

⁶Maw Jakob ih Pathian, annih cu na hro hai tikah, An rang le a totu pawl cu an ril ih an thi.

⁷Maw BAWIPA, ṭih na nun zia hi! Na thin a heng tikah, Zoso na hmaiah a ding ngam ding!

⁸Na thuṭhennak cu vancung ihsin na run theihter. Leilung cu a ṭih tukah caang lotein a um.

⁹Leilung tlunih hmuhsuam hremnak a tuartu pawl, Run dingah le thuṭhennak than dingih na din tik ahcun.

¹⁰Minung thinhengnak a um tikah Nangmah thangṭhatnak a tam sinsin. Raldonak ihsin a luattu pawl in Na puai pawl an run tuah ṭheu ding.

¹¹BAWIPA nan Pathian hnenah nan tiamkam ciami cu pe uh. Kiangkap ih ram pawl nannih khal in a hnenah laksawng pe uh. Pathian in minung pawl cu amah ṭih dingin a tuah.

¹²Siangpahrang fapa hngal zetzet pawl cu mual a photer hai ih, Siangpahrang tum zetzet pawl khal ṭihphang in a umter hai.