Read Falam Chin SAAM HLABU 77 Bible Online

SAAM HLABU 77 - Falam Chin bible

SAAM HLABU 77

¹[69] Pathian hnenah napi in ka au; Napi in ka au ih amah in i thei.

²Harsat caanah BAWIPA ih hnenah thla ka cam; Thlacam in zanvar ka ban ka phar, Asinain hnemnak ka ngah lo.

³Pathian ka ruat ih thinlung har in ka hui ih ka aihram; Thuk deuh in thu ka ruat ih ka thin a nau sinsin.

⁴Pathian in zanvarte itthat loin i tuah; Ka thinlung a har tuk ih ka ṭong thei lo.

⁵A cem ciami ni le thla ka vun ruat; A lan ciami kum pawl ka vun mang sal.

⁶A phunphun khawruat in zan ka var. Ka ngaihtuah vivo ih ka thinlung in thu ka suut aw:

⁷“BAWIPA in in hnong kumkhua ding maw? Kan parah a lung a awi dah nawn lo ding maw?

⁸In duhdawtnak cu a cemta rori ding maw? A thukamnak hi ziangtik hmanah kim ti a nei lo ding maw?

⁹Pathian in zaangfahnak a nei nawn lo maw si? A lainatnak cu a thinhengnak in a airawl zo maw si?

¹⁰Ziang dang hnakin ka thin i nattertu bik cu: Pathian in thil ti theinak Zianghman a neih nawn lo hi a si,” tiah ka ti.

¹¹Maw BAWIPA, na thil tuahmi, Mangbangza pawl ka ciing ring ring ding; A cem ciami caan ih khawruahhar na tuahmi pawl kha, Ka vun mang sal ding a si.

¹²Na hnaṭuan ciami hmuahhmuah ka ruat sal pei; Na tuahmi a zatein ka ngaihtuah sal pei.

¹³Maw Pathian, na thil tuahmi hmuahhmuah hi, An thianghlim a si; Nangmah bangtuk a tummi Pathian zohman a um lo.

¹⁴Nang cu mangbangza tuahtu Pathian na si; Miphun tampi hnenah na cahnak na langter.

¹⁵Na huham in na minung pawl cu na hum; Jakob le Josef ih tefa pawl cu.

¹⁶Maw Pathian, tidai pawl in an lo hmuh tikah an lo ṭih; Tipithuanthum tla cu a tawdeng tiangin a khur ṭheh.

¹⁷Khawdur in ruahti a run burh; Van ihsin khua a ri durdo ih, Nimthla cu khuazakip ah a kau zukzo.

¹⁸Na khawri cun cat thiam loin khuazakip a tlir ih, Na nimthlakau in leilung pumpi a tlet; Leilung pumpi cu a khur ih a hnin hlurhlo.

¹⁹Nang cu tifinriat na tan ih na feh; A thuk zetmi tipithuanthum khal na tan thei. Asinain na keneh pawl cu hmuh an theih lo.

²⁰Na minung pawl cu tuukhal bangin na hruai; Moses le Aaron cu a hotu an si.