Read Falam Chin SAAM HLABU 78 Bible Online

SAAM HLABU 78 - Falam Chin bible

SAAM HLABU 78

¹[70] Maw ka minung pawl, ka lo zirh mi thu hi ngai uhla, Ka thusimmi hi nan hna tun hnik uh.

²Nan hnenah thu ka sim ding; A cem ciami kum le san ih, Thuthuk ka lo sim ding.

³Kan hna ih theih ciami le Kan thinlung khalih theih ciami, Kan pupa pawl ih in sim ciami thu pawl cu.

⁴Cuih thu cu kan faate pawl hnen ihsin kan thup lo ding ih, BAWIPA ih huham le cahnak mangbangza pawl, Thil mangbangza a tuahmi pawl cu A ra lai dingmi san khal ah kan sim ding.

⁵Israel mi pawl hnenah daan a pek ih, Jakob ih tefa pawl hnenah thukham a pek. An faale pawl hnenih zirh dingah Kan pu le kan pa pawl hnenah daan a pek a si.

⁶An faale pawl in anmah ih faale hnenah an zirh ih, Cuih faale pawl in anmah ih faale hnenih zirhsin vivo ding ah a pek a si.

⁷Cuticun annih khal in Pathian an rinsan ding ih, A thil mangbangza tuahmi kha hngilh loin an um ding ih, A thukham pawl cu an thlun ringring ding a si.

⁸Annih pawl cu an pu le an pa, Mi lungruh le dodal hmang pawl, Pathian an rinsannak ziangtik hmanih a hnget dah lo pawl le, Pathian rintlak ih a um dah lo pawl bangtuk cu an si lo pei.

⁹Li le conkiang thawn raldotu Efraim mi pawl cu, Raldo tikcu a thlen ngaingai cun an tlanhlo ṭheh.

¹⁰Pathian thawn an thukammi an thlun lo; A daan an thlun fawn lo a si.

¹¹Mangbangza tuahmi thil pawl le An hnenih thil khawruahhar a langter mi pawl cu, an hngilh zo a si.

¹²Izipt ram sung, Zoan nelrawn, Pathian ih mangbangza tuahmi cu an pupa pawl in an hmu.

¹³Pathian in tifinriat a ṭhen ih cutawkin a hruai hai. Tidai pawl cu phar bangin a dinter.

¹⁴Sun ah khawdur thawn a hruai ih Zan ah meitleu thawn a hruai hai a si.

¹⁵Nelrawn ramṭhing ih lungto tumpipi a khuai ih an in dingah, Leilung thuk zetih tidai cu a putter.

¹⁶Lungto ihsin tidai a putter ih Tidai cu tiva bangin a luanter.

¹⁷Sikhalsehla Pathian parah an sual thotho ih, Cungnungbik BAWIPA dodal in, Nelrawn ramṭhing ahcun ral an tho ṭhiamṭhiam.

¹⁸Pathian cu an hniksak hrim, An hiarmi rawl an dil hrim.

¹⁹Pathian an soi ih, “Nelrawn ahhin Pathian in Cabuai thawn rawl in pe thei ngai pei maw?

²⁰Lungto cu a vuak ih tidai a puut zurzo ngai; Asinain saang in pe thei ngai pei maw? Ei dingah sa in pe ngai pei maw?” tiah an sut lai hrih.

²¹Curuangah BAWIPA cu an parah a ai a thok ih, Cutiih a parah zumnak an neih lo ruangah le, In runsuak thei ding ti ih an rinsan lo ruangah,

²²Meisa hmang in a hrem hai ih A minung pawl parah a thin a heng deuhdeuh.

²³Sikhalsehla tlunlam van hnenah thu a sim ih, A sangka pawl ong dingah thu a pek.

²⁴Van ihsin rawl a pek hai ih An ei dingah manna a run thlak.

²⁵Cuticun vancungmi pawl ih rawl kha an ei ih, An ei thei zat in Pathian in a pek hai a si.

²⁶Cuih hnuah nisuahnak lam thli a hrangter; Thlanglam thli a huham in a thoter ih,

²⁷An hnenah vate cu leidip zat in a run thlak; Tifinriat kap ih vunnel zat in a run thlak an si.

²⁸An riahhmun laifang, an puanthlam kiangkap ahcun, A tortor in an tla hnenhnen.

²⁹Cuticun an duhzat an ei ih an lung a kim, Pathian in an duhmi hmuahhmuah a pek a si.

³⁰Sikhalsehla an ei rero laiah, Diriam ko ih an ei ngah hlanah,

³¹Pathian cu an parah a thin a heng ih, Anmah lakih mi cak bik pawl, Israel mi lakih mino ṭha bik pawl a that hai.

³²Hi bangtuk mangbangza tampi tuah hmansehla, A minung pawl cu an sual thotho. An Pathian cu an rinsan cuang lo.

³³Curuangah an damsung ni cu thaw bangin a tawiter ih, An nunnak cu rinlopi ah siatsuah nak a tong a si.

³⁴Cutin mi hrekkhat pawl a thihter hnuah, A dang pawl cu amah hnenah an kir sal. An sual an siir-aw ih thinlung taktein a hnenah thla an cam.

³⁵Pathian cu anmah humtu a si kha an thei sal ih, Cungnungbik cu an runtu a si kha an ciing sal.

³⁶Asinain an hmurka in an porh an bum ih, An ṭongmi hmuahhmuah cu thuphan hlir a si. Thungai zianghman a um lo.

³⁷Amah tlaihsannak zianghman an nei lo. Amah thawn an thukammi cu an kimter cuang lo.

³⁸Sikhalsehla Pathian cu a minung pawl hnenah, Zaangfahnak lainatnak a nei ih an sualnak cu a ngaidam. Curuangah a siatsuah thluh hai lo. Voi tampi thinheng loin a suup, A aithoknak cu a daiter thei sal a si.

³⁹A minung pawl cu mihring lawng an si ih, Thli vekin a hrangih a hlosalmi lawng an si, ti kha a ciing ringring.

⁴⁰Voi ziangzat mengso thlaler ramṭhing ah, Pathian dodal in ral an thawh! Voi ziangzatso a riah an siatter!

⁴¹Atu le atu Pathian cu an hnik sak ih, Israel ih Pathian Thianghlim cu a thin an hengter.

⁴²A huham a tumzia cu an hngilh! An ral pawl kut sung ihsin A hum hainak tikcu kha an thei nawn lo!

⁴³Izipt ramsung, Zoan nelrawn ih Mangbangza le khawruah har a tuahmi pawl an ciing nawn lo.

⁴⁴An tiva pawl cu thisen ah a canter ṭheh, Cuticun Izipt mi pawl cu an tiva ihsin tidai an ngah thei nawn lo.

⁴⁵An lakah thothe a thlah ih a hrem hai; Butlak khal a thlah ih an lo pawl a siatsuah ṭheh.

⁴⁶Kharbok a thlah ih an rawl pawl an ei ṭheh; Cuih kharbok cun an lo pawl an tisiat ṭheh.

⁴⁷An sabit hri pawl cu rial in a thah ih, An theipi kung pawl cu vur in a thihter ṭheh.

⁴⁸An caw pawl rial in a thah ih An tuu pawl cu ṭeek in a thah ṭheh.

⁴⁹A nasa zetmi a thinhennak le A lingsa zetmi a ai-thawhnak cu An parah a run burh ciamco. Awloksong le vansaanglam in a tuah hai ih, Mi siatsuahtu vancungmi an hnenah a vun thlah.

⁵⁰A thinheng khal a suup lo; An nunnak khal a zuah lo. Pulhnat in a thihter hai a si.

⁵¹Izipt mi innsung saang hmuahhmuah ih, Fapa upa bik a thah ṭheh a si.

⁵²Cule tuukhal bangin a minung pawl cu a hruaisuak ih, Nelrawn ramṭhing ah a khor hai. Nelrawn tan in a hruai a si.

⁵³Thlangamten a hruai ih ziang hman an ṭih lo; An ral pawl sawn cu tifinriat in a khuh ṭheh hai a si.

⁵⁴A minung cu a ram thianghlim ah a fehpi; Amah ih a nehmi tlang parah cun a hruai hai a si.

⁵⁵A minung pawl hmaiih an nor deuhdeuh tikah, Cuih ram a rak umtu pawl cu a dawihlo; Ram cu Israel miphun pawl hnenah a zem ih, An khua le an inn ciarah a umter hai a si.

⁵⁶Sikhalsehla Ziangkimtithei Pathian cu an hniksak ih, Amah do dingah ral an tho; A thukham pawl an thlun lo.

⁵⁷An pu le an pa pawl vekin ral tho duh pawl le, Mi dodal duh pawl an si; A ngawimi li ihsin saimi conkiang vekin rintlak lomi pawl an si.

⁵⁸An khawzing biaknak hmun pawl an tuah ruangah, Pathian a thin an hengter. An milem pawl ruangah thiik an neihter a si.

⁵⁹Cumi pawl a hmuh tikah Pathian cu a ai a thok ngaingai ih, A minung pawl cu a dungtun hai a si.

⁶⁰Minung hnenih a rung um ṭheunak a inn, Shiloh ih a puanthlam cu a suahsan.

⁶¹A huham le a sunlawinak pawl a langnak Thukam Kuang cu ral pawl a longter.

⁶²Amah ih minung parah a thin a heng ih, An ral pawl a thahter hai.

⁶³Raldonak ah tlangval hmuahhmuah an thi ṭheh ih, Fala pawl hrangah pasal ding an um nawn lo.

⁶⁴Puithiam pawl khal ralnam in an thi ih, An nupi pawl khal in an ṭah lo.

⁶⁵Neta bik ah BAWIPA cu, Ihnak ihsin hung ṭhang vek khin a tho; Micak zet pa cu sabitti ih a tha a thawhter vekin a tho a si.

⁶⁶A ral pawl cu an dunglam ah a nor vivo; An ningzak koin a neh hai ih an tho thei nawn lo.

⁶⁷Asinain Josef ih tefa pawl cu a hnongta; Efraim phun pawl khal a hril nawn lo.

⁶⁸An ai ah Judah phun le A duh zetmi Zion Tlang a hril.

⁶⁹Cutawkah vancungih a umnak inn bangin a Biakinn a thianghlimmi cu a sak. Leilungpi bangtuk ih san khat hnu san khat fek dingah a sak ih a hngetter a si.

⁷⁰Amah in a siahhlawh David a hril; Tuu a khalhnak ihsin le

⁷¹Tuu note a kilkhawinak ihsin a ko. Israel siangpahrang ah a tuah, Pathian ih minung pawl khaaltu dingah.

⁷²Thinlung zate pek in a kilkhawi ih, Felnak le thiamnak thawn a hruai hai a si.