Read Falam Chin SAAM HLABU 79 Bible Online

SAAM HLABU 79 - Falam Chin bible

SAAM HLABU 79

¹[71] Maw Pathian, nangmah a lo thei lotu pawl in na ram an ra siim. Na Biakinnpi thianghlim an borhhlawhter ih Jerusalem an siatsuah ṭheh a si.

²Na minung pawl ih ruak cu langta ei dingah an taanta; Na siahhlawh pawl ih ruak khal ramsa ei dingah an ti.

³Na minung pawl ih thisen cu tidai bangin an suahter; Jerusalem khuasung hmunkip ah thisen cu tidai bangin a luang. Ruak pawl phumtu dingah zohman an taang lo.

⁴Kan kiangkapih miphun dangdang pawl in caponak ah in hmang; In hnihsan ih in nautat a si.

⁵Maw BAWIPA, kan parah ziangtik tiangso na thin a heng ding? Kumkhua in maw? Na thinhengnak hi meisa bangin maw a alh ringring ding?

⁶Nangmah a lo bia lotu miphun pawl le na hmin a ko lotu pawl parah cun na thin khal heng ko aw!

⁷Ziangahtile na minung pawl an that zo ih, Kan ram khal an siatsuah zo a si.

⁸Sikhalsehla kannih cu kan pupa pawl ih sualnak ruangah cun in hrem hram hlah aw. Zaangfahnak kan parah nei zaang hram aw. Ziangahtile ruahsannak zianghman kan nei nawn lo.

⁹Maw Pathian, in bawm awla in run aw. Na hmin sunlawinak dingah, Kan sualnak in ngaithiam awla in tlen hram aw.

¹⁰Ziangah so miphun dangdang in, “Nan Pathian khui-ah so a um?” tiah in suut ringring ding? Na siahhlawh pawl ih thisen an suah ruangah hi miphun dangdang pawl kan mithmuh ah hrem hai aw.

¹¹Thawngtla pawl ih hruumnak aw cu ngai hram awla, Thah dingih thuṭhen ciami pawl Na cahnak huham in luatter hram hai aw.

¹²Maw BAWIPA, na thangsiatnak na hnen an hun thlenter ruangah, Hi miphun dangdang pawl parah A letsarih in phu la hram aw.

¹³Cuticun kannih na minung, na tuu rual pawl hin, Kumkhua in na hnenah lungawinak thu kan rel ding ih, San khat hnu san khat in kan lo thangṭhat ringring ding.