Read Falam Chin SAAM HLABU 80 Bible Online

SAAM HLABU 80 - Falam Chin bible

SAAM HLABU 80

¹[72] Maw Israel Tuukhal, in ngai hnik aw. Maw tuurual hotu bangin Josef a hruaitu, in thei hnik aw. Cherubim tlun, siangpahrang tokham ih a totu,

²Ni bangin rung tlang awla, Efraim, Benjamin le Manasseh hrin pawl hnenah rung lang aw. Na cahnak in hmuh awla in ra run hram aw.

³Maw Pathian, in tungding sal hram aw; Na zaangfahnak mithmai in hmuh awla runnak kan ngah ding a si.

⁴Maw BAWIPA, Ziangkimtithei Pathian, ziangtik tiangso na minung pawl ih thlacamnak parah na thin a heng hrih ding?

⁵Kan ei dingah riahsiatnak in pek ih, Kan in dingah mitthli, khuathai tumpi khat, in pek.

⁶Kan kiangkap miphun dangdang Nangmah ih lungkimnak thawn kan ram sungah an do aw. Cule kan ral pawl in caponak ah in hmang.

⁷Maw Ziangkimtithei Pathian, in tungding sal hram aw; Na zaangfahnak mithmai in hmuh awla runnak kan ngah ding a si.

⁸Izipt ram ihsin sabit hri pakhat na keng ih, Miphun dangdang na dawi hnuah An ram sungah cuih sabit hri cu na phun.

⁹A ṭhannak dingah hmun na simsial sak; A hram pawl cu leilung sung thukpi ah an lut; A ṭhang ih ram pumpi a khuh ṭheh.

¹⁰Tlang pawl cu a hneem thuaiah an um; Hnge tampi a neimi sidar thing tumpipi bangin!

¹¹A hnge cu Mediterranean Tifinriat le Zufrates Tivapi thleng tiang a zaam a si.

¹²A kimvel ih kulh mi hauhruang cu ziangah so na bal ṭheh? A kiangih a fehtu poh in a rah an fir thei a si.

¹³Ngalcang in a palsiat ṭheh ih, Hramlak ramsa pawl in an ei a si.

¹⁴Maw Ziangkimtithei Pathian, Kanmah lam hoikir sal aw. Vancung ihsin in run zoh awla Na sabit hri cu rung veh hram aw.

¹⁵Ra awla nangmah rori ih na phun mi, sabit cakzetih na tuah zomi, Na sabit cerh hi ra run hram aw.

¹⁶Kan ral pawl in cuih sabit cu Meisa in an ur ih an saattan. A saattantu pawl cu na thinheng in zoh awla siatsuah hai aw.

¹⁷Na hrilmi na minung cu hum aw; Na hrangah cakzetih na tuah zomi minung cu!

¹⁸Na hnen ihsin kan pial nawn hrimhrim lo ding; In nungter awla kan lo cawimawi ding a si.

¹⁹Maw BAWIPA, Ziangkimtithei Pathian, in tungding saal hram aw. Na mithmai ṭha kan parah run tlangter awla, Runnak kan ngah ding a si.