Read Falam Chin SAAM HLABU 82 Bible Online

SAAM HLABU 82 - Falam Chin bible

SAAM HLABU 82

¹[74] Vancung ah pathian pawl tonkhawmnak a um ih Pathian in hotu a ṭuan; Cuih tonkhawmnak ahcun Pathian in thuṭhennak a tuah.

²“A dik loih thuṭhennak nan baang thlang pei. Mi ṭha lo pawl nan ṭan cuang nawn lo pei.

³Mi tlasam le ngakṭah farah pawl nan bawm pei ih, Bawmtu nei lo le mi zonzai pawl parah dingthluk lairelnak thawn thu nan ṭhen pei.

⁴Mi farah le mi tlasam pawl nan hum pei ih, Mi ṭha lo pawl kut sung ihsin nan run pei.

⁵Zianghman nan va thei lo lawmmam so! Nan va aa lawmmam so! Khawthim sungah nan um ih, Dingthluk lairelnak cu lei tlun ihsin a hloral zo.

⁶‘Nanmah tla cu pathian nan si,’ tiah ka lo sim zo. Nan zatein Cungnungbik ih fapa nan si.

⁷Sikhalsehla milai vekin nan thi ve ding. Zovek siangpahrang fapa a si hmanah a nunnak a cem ṭheu vekin, Nannih khal nan cem ding a si,” tiah a ti.

⁸Maw Pathian, ra awla leilung hi thu ra ṭhen aw. Miphun hmuahhmuah hi nangmah ih ta an si.