Read Falam Chin SAAM HLABU 84 Bible Online

SAAM HLABU 84 - Falam Chin bible

SAAM HLABU 84

¹[76] Maw Ziangkimtithei Pathian, na Biakinnpi cu ziangtluk in so ka duh!

²A sung thlen cu ziangtluk in so ka hiar! BAWIPA ih Biakinn sung thlen cu ka ngaizet a si. Ka thinlung zatein a nungmi Pathian hnenah lungawi in hla ka sa.

³Sunṭam hman in bu an sak ih Vanva khal in inn an nei. Na biakṭheng kiangah cun an fano an ret. Maw Ziangkimtithei BAWIPA, Ka siangpahrang le ka Pathian.

⁴Na Biakinn thiang sungih a ummi Na hnenih thangṭhatnak cat lo ih a satu pawl cu, Mi lungawi an va si so!

⁵Na hnen ihsin thazaang a latu Zion Tlang lamih thinlung a retu pawl cu, Mi thlawsuak an va si so.

⁶A caarmi Baka horkuam sung an feh hmanah, Tidai puutnak hmunah a cang; ṭoruah in tikhur pawl cu a khahter theh a si.

⁷An feh phah in an cak deuhdeuh; Annih cun pathian lakih Pathian bik cu Zion ah an hmu ding.

⁸Maw BAWIPA Pathian, Ziangkimtithei, ka thlacamnak ngai hram aw; Maw Jakob ih Pathian, ka aunak i theihsak hram aw.

⁹Maw Pathian, kan siangpahrang i humtu hi thlawsuahnak pe aw, Na hril ciami siangpahrang cu.

¹⁰Na Biakinnpi sungih ni khat um cu, Hmundang ih ni thawng khat um hnakin a ṭha sawn. Ka Pathian ih inn sangka kil cu Mi ṭha lo pawl inn sungih um hnakin ka duh sawn.

¹¹BAWIPA cu in humtu le a sunglawimi siangpahrang a si. Zaangfahnak le sunlawinak thawn in thlawsuah a si. Thil dik a tuahtu hnenah cun Thil ṭha pek dingah zianghman a ui lo.

¹²Nangmah a lo rinsantu cu, Maw Ziangkimtithei Pathian, mi thlawsuak an si.