Read Falam Chin SAAM HLABU 88 Bible Online

SAAM HLABU 88 - Falam Chin bible

SAAM HLABU 88

¹[80] Maw BAWIPA Pathian, i runtu, sun nihlawh ka lo ko; Zan ah na hmai ah ka ra.

²Ka thlacamnak ngai awla, Bomnak dil ih ka aunak hi i theihsak hram aw.

³Harsatnak tam tuk in i tlun ih Sheol ka thleng zik thlang.

⁴Mithi zik dang vek thotho ka si; Ka tha a poih ṭheh zo.

⁵Mithi lakih taanta mi ka si. An thah ih thlaan ih an retmi, Na hngilh fai zomi le bom ding khal ih na ruah ban nawn lomi vek ka si.

⁶Thlaan tawdeng bikah nangmah in i hlon zo; A thim bik le a thuk bik khur sungah i thlak a si.

⁷Ka parih na thinhengnak cu a rit ngaingai; Na ai-thawhnak tisuar in i delh tuk a si.

⁸Nangmah ih forhfialnak thawngin, Ka rualpi pawl in in hrial, I theitu pawl in in fih a si. Kharhkhummi ka si ih ka suak thei nawn lo.

⁹Zonzai ka tuar tuknak ah ka mit a mal; Maw BAWIPA, nitinte ka lo ko ih ban phar in na hnen ah thla ka cam.

¹⁰Mithi hrangah mangbangza na tuah dah maw? Mithi pawl tho saal in an lo thangṭhat dah maw?

¹¹A thleng aw dah lomi na duhdawtnak thu cu, thlaan sungah an rel dah maw? Na rintlaknak cu hlohralnak Abaddon hmunah an sim dah maw?

¹²Mangbangza na tuahmi cu khaw- thimnak hmun ah an hmu maw? Na ṭhatnak cu hngilhnak ram ah an thei maw?

¹³Maw BAWIPA, bomnak dil in ka lo ko; Zingtinte na hnenah thla ka cam.

¹⁴Maw BAWIPA, ziangah so i hnon? Ziangah so ka hnen ihsin na relh?

¹⁵Ka no lai ihsin thi zik in ka tuar ringring; I hrem ruangah ka vuai ṭheh zo.

¹⁶Mei bangin a alhmi na thin- hengnak cu ka parah a hlio; Na ṭihnungza thil in i siatsuah ṭheh.

¹⁷Sun nihlawh tisuar bangin in kulh; Ka kimvel in in naih cuahco.

¹⁸I duhtu le ka rualpi ṭha bik khal na tlanter thluh hai ih Ka rualpi neihsun cu khawthim lawng hi a si.