Read Falam Chin SAAM HLABU 89 Bible Online

SAAM HLABU 89 - Falam Chin bible

SAAM HLABU 89

¹[81] Maw BAWIPA, a hmunmi na duhdawtnak cu hla in ka sak ringring ding. Rintlak na sinak cu kumkhua in ka than ding.

²A hmunmi na duhdawtnak cu kumkhua in a fek ding ih, Rintlak na sinak cu van vekin a hmun ding, ti ka thei.

³Nangmah in, “Ka hrilmi pa thawn thukamnak ka tuah zo; Ka siahhlawh David hnenah thu ka tiam zo;

⁴‘Na tefa pawl in cat loin siangpahrang an ṭuan ding; Na uknak cu kumkhua in ka hngetter ding,’ ka ti,” tiah na sim.

⁵Van pawl khin mangbangza na tuahmi cu an thangṭhat; BAWIPA, rintlak na sinak cu, Vancung ih na mi thianghlim pawl in hla in an sak.

⁶Maw BAWIPA, vancung ah nangmah bangtuk an um lo. A lo bangtu pathian an um lo.

⁷Mi thianghlim pawl tonkhawmnak ah nangmah cu an lo upat ih, Na kiangkapih ummi pawl in an lo ṭih a si.

⁸Maw BAWIPA Pathian, Ziangkimtithei, nangmah vekih a cakmi zohman an um lo. Maw BAWIPA, ziangtinkim ah nang cu rintlak na si.

⁹Huham a neizetmi tifinriat cu na uk ih, A cak zetmi tisuar cu na daiter.

¹⁰Ramsa ṭihnungza Rahab cu na sutbeek ih na that; Na ral pawl cu na cahnak in na ṭhekdarh ṭheh a si.

¹¹Leilung hi na ta a si; Van khal khi a si thotho. Leilung pumpi hi na seemsuah ih a sungih ummi khal na tuah.

¹²Thlanglam le saklam khal nangmah ih seemsuah mi an si. Tabor Tlang le Hermon Tlang cu Lungawi in na hnenah hla an sa.

¹³Huham na neih zia hi! Na thazaang a cah zia cu!

¹⁴Na tokham cu dingfelnak le dingthluk lairelnak parah na toh; A hmunmi duhdawtnak le rintlak na sinak in ziang hmuahhmuah na tuah.

¹⁵Hla thawn a lo biatu pawl cu mi lungawi an si; Na mithmai ṭha tleunak sungih a tlanglengtu pawl cu, BAWIPA, Mi thlawsuak an si.

¹⁶Ziangahtile nangmah ih ruangah sun nihlawh an nun a nuam; Na ṭhatnak ruangah nangmah cu an lo thangṭhat.

¹⁷Ral nehnak nasa zetzet in pek; In zaangfah ih nehtu ah in tuah.

¹⁸Ziangahtile in humtu cu, BAWIPA nangmah ih hrilmi a si. Nang, Israel mi ih Mi Thianghlim in siangpahrang in pek.

¹⁹Hlanlaipi ah na langnak in, Na siahhlawh pawl hnenah thu na rak phuang ih, “Ralkap hminthang zet parah, Siangpahrang lukhuh ka ret zo; A miphun sung ihsin hrilmi pa ih hnenah, Siangpahrang tokham ka pe zo.

²⁰Ka siahhlawh David cu ka hril zo ih, Nan siangpahrang ah hriak thianghlim ka culh zo.

²¹Ka cahnak cu a hnenah a um ringring ding ih, Ka huham in mi cakzet a siter ding.

²²A ral pawl in an fimhleih lo ding ih, Mi ṭha lo pawl khal in an ti ngam lo ding.

²³A ral pawl cu ka ciil ding ih, A huatu pawl cu ka that ding.

²⁴Amah cu a hmunmi duhdawtnak thawn ka duh ding ih, Ka tlaihsan ringring ding. Ral neh ringringtu ah ka tuah ding.

²⁵A ukmi ram cu Mediterranean Tifinriat in Eufrates Tivapi tiang ka kauter ding.

²⁶Anih in, ‘Nang cu ka pa le ka Pathian na si; Ka lungpi le i rundamtu na si,’ i ti ding.

²⁷Amah cu ka fapatir ah ka tuah ding ih, Siangpahrang lakih siangpahrang tum bikah ka tuah ding.

²⁸A hnenih ka thukammi cu ka kimter ding ih, Amah thawn thukam ka tuahmi cu, kumkhua in a hmun ding.

²⁹A tefa in siangpahrang an ṭuan ringring ding ih, A uknak cu van vekin a hmun ding.

³⁰Sikhalsehla a tefa pawl in ka daan an thlun lo ih, Thukham ka pekmi vekin an nung lo a si ahcun,

³¹Ka thupekmi pawl zianghman ah an siar lo ih, Ka thukham pawl an thlun lo a si ahcun,

³²Anmah ih sualnak ruangah nuang fung thawn ka hrem hai ding. Anmah ih mawhnak ruangah ka vuak hai ding a si.

³³Sikhalsehla David cu ka duhdawt ringring ding ih, A hnenih ka thukammi tla ka kimter ringring ding.

³⁴Amah thawn ka thukam cu ka bal lo ding ih, A hnenih ka tiam ciami thukamnak pakhatte hman ka la kir lo ding.

³⁵Kumkhua daih in a hnenah ka hmin thianghlim in thukamnak ka tuah zo. David hnenah thuphan ka sim lo ding.

³⁶Cat loin tesinfa a nei ding ih, Ni a tlan sung hmuahhmuah ah A ram uknak cu ṭhatein ka zoh ding.

³⁷Van ih a ummi thu theihpitu Thlapi vekin kumkhua in a hmun ding a si,” na rak ti.

³⁸Asinain na hrilmi siangpahrang parah na thin a heng; Amah cu na tlansan zo ih na hnong zo a si.

³⁹Na siahhlawh amah thawn thukam na tuahmi na siatbal thluh zo. A siangpahrang lukhuh cu leivut lakah na hlon sak.

⁴⁰A khawpi kulhnak phar pawl cu na balcim ṭheh ih, A ralhruang pawl cu na siatsuah thluh a si.

⁴¹A feh sukso pawl in a thilri an ruk sak ih, A inn hnen pawl in caponak ah an hmang.

⁴²Ralnehnak cu a ral pawl hnenah na pek ih, An lung na awiter ṭheh a si.

⁴³A hriamnam pawl cu santlai lo na canter ih, Raldonak ah na sunter.

⁴⁴A siangpahrang kianghrol cu na long saal ih, A siangpahrang tokham cu leilung ah na tuul thluk.

⁴⁵Tar a cu lo naón na tarter ih, Ningzah mualphonak in na khahter.

⁴⁶Maw BAWIPA, kumkhua in maw na relh ringring ding? Ziangtik tiangso na thinhengnak cu meisa bangin a alh ding?

⁴⁷Maw BAWIPA, milai nunnak a tawizia hi hngilh hlah aw; Mi hmuahhmuah a thi ding ih na tuah hi ciing hram aw.

⁴⁸Thi lo ih a nung ringringtu zoso a um? Sheol thleng lo ih a luat theitu zoso a um?

⁴⁹Maw BAWIPA, in duhdawt zia a hlan ih na langtermi pawl kha khui-ah so an si? David hnenih na tiam ciami Na thukamnak pawl kha atu khui-ah so an um?

⁵⁰Kei na siahhlawh hmuhsuam ka si zia hi hngilh hram hlah aw. Khawvel pawl ih nautatnak ka tuar zia hi!

⁵¹Maw BAWIPA, na ral pawl in na hril cia mi Siangpahrang cu an va hmuhsuam lawmmam so! A fehnak kip ah an hmuhsuam a si.

⁵²BAWIPA cu kumkhua in thangṭhat uhsi! Amen! Amen!