Read Falam Chin SAAM HLABU 90 Bible Online

SAAM HLABU 90 - Falam Chin bible

SAAM HLABU 90

¹[82] Maw Bawipa, nang cu kumkhua in kan inn na si.

²Tlang pawl na tuah hlanah le, Leilung pumpi na seemsuah hlan ihsin nang cu thawhnak le cemnak nei loin, A kumkhua in Pathian na si ringring.

³Minung cu leilungih kir sal dingin thu na pek ih, Leilung ah na canter a si.

⁴Kum thawng khat cu na hmaiah ni khat bangtuk a si; A cem ciami manisun vek a si ih Zan ih tikcu tawite sung vek a si ko.

⁵Tilian vekin minung cu na fen hlo hai; Mang hnakin rei deuh an awh cuang lo.

⁶Zinglam ih a khomi hrampi, a ṭhang ih a par; Asinain a vuai ih zanlam ah a thimi bangtuk an si.

⁷Na thinhengnak in in siatsuah ṭheh; Na ai-thawhnak in in ti hloral ṭheh.

⁸Kan sualnak pawl cu na mithmuh ah na ret; A thupte ih kan sualnak khal na hmu ṭheh a si.

⁹Kan nundam ni cu na thinhengnak in a tawiter; Kan nunnak cu dimte ih ṭongmi aw vekin a cem.

¹⁰Kan nundam kum cu kum sawm sarih sung a si; Kan dam cak asile kum sawmriat khal a si thei. Asinain hi kan nunsung kum ih in summi cu, Harsatnak le donharnak lawng a si. Nunnak cu rei lo ah a cem ih kan hlota.

¹¹Na thinhennak a cahzia hi zoso a thei thei? Na ai-thawhnak ih a thlentermi ṭihnak cu zoso a hmu cawk ding?

¹²Kan nun tawizia siar daan in zirh awla, Cule mifim ah kan cang ding.

¹³Maw BAWIPA, ziangtik tiangso na thin a heng ding? Na siahhlawh pawl hi in zaangfah hram aw.

¹⁴A hmunmi na duhdawtnak thawn zingtinte in khatter aw; Cuticun kan nundam sung nunnuam le hlasa in kan um ding.

¹⁵Harsat zonzaihnak kan tuar kum sung hmuahhmuah ahhin, Riahsiatnak in pek zat tal in Lungawinak in pe ve hram aw.

¹⁶Kannih na siahhlawh pawl hi na thil tuahmi a nasa zet pawl in hmuh aw; Kan tefa pawl khal na thacahnak sunglawi cu hmuhter ve hai aw.

¹⁷BAWIPA kan Pathian, na mithmai ṭha kan hnenah um hram seh; Kan tuahmi hmuahhmuah ah hlawh tlinnak in pe aw. Asi, kan tuahmi hmuahhmuah ah hlawhtlinnak in pe hram aw.