Read Falam Chin SAAM HLABU 91 Bible Online

SAAM HLABU 91 - Falam Chin bible

SAAM HLABU 91

¹Cungnungbik hnenah himnak duh ah feh tahratin, Ziangkimtithei thladem thuai ih a umtu cun,

²BAWIPA ih hnenah, “Nang cu ka beunak le ka ralhruang na si; Ka Pathian na si ih ka lo rinsan a si,” a ti thei ding.

³A lang lomi ṭihphannak ihsin a lo hum ding ih, Natsia a phunphun sungin a lo luatter ding.

⁴A thla in a lo hup ding ih, A lo kilkhawinak sungah na him ding; Rintlak a sinak cu na ral phawpi le phawte an si.

⁵Zan ih ṭihphan ding tla na phang lo ding ih, Sun ih conkiang khal na ṭih lo ding.

⁶Khawthim lakih a vakmi pulhnat, Sun khawvang ih mi thah hmang siatsuahtu khal na ṭih lo ding.

⁷Na siir ah thawng khat an tlu ding ih, Na kiangkap ah thawng hra an ril ding, Sikhalsehla nang cu tuahmawh na si lo ding.

⁸Mi ṭha lo pawl hremnak an tuarzia cu, Na zoh ding ih na hmu ding.

⁹BAWIPA cu a lo ṭantu ah na tuah ih, Cungnungbik cu a lo humtu ih na hman ruangah,

¹⁰Siatsuahnak zianghman na tong lo ding; Na inn kiangah thisen luannak a thleng lo ding.

¹¹Na fehnak hmunkip ih a lo humtu dingah le, A lo kilvengtu dingah Pathian in A vancungmi pawl a ret ding.

¹²An kut in an lo cawi ding ih Na ke cu lungto ah na khawng lo ding.

¹³Kiosa le rul na pal ding; A heer zetmi kiosa le tur nei rul pawl cu na pal ding a si.

¹⁴Pathian in, “Keimah i duhtu pawl cu ka run ding ih, BAWIPA ka si hi i theitu pawl cu ka hum ding.

¹⁵In kawh tikah ka awi hai ding; Harsatnak an ton tikah an hnenah ka um ding; Ka luatter ding ih hmin ṭhatnak ka pe hai ding.

¹⁶Nun saunak laksawng ka pe ding ih, Ka runsuak tengteng hai ding,” a ti.