Read Falam Chin SAAM HLABU 92 Bible Online

SAAM HLABU 92 - Falam Chin bible

SAAM HLABU 92

¹[83] BAWIPA hnenih lungawi thu rel le, Cungnungbik Pathian, na hmin thannak hla ih sak cu a va nuam so!

²A hmunmi na duhdawtnak cu zingtinte phuang in, Rintlak na sinak cu zantinte phuang sehla,

³Hri a nei ih tum theihmi awnmawi: ṭingṭang le tingrisit pawl thawn, Rintlak na sinak zantinte thanter cu a va nuam so!

⁴Maw BAWIPA, na thil tuahmi mangbangza in ka lung i awiter. Na tuahmi ruangah lungawi in hla ka sak.

⁵Maw BAWIPA, na thil tuahmi hi a va mak so! Na ruahnak cu a va thuk lawmmam so!

⁶Mi aa pawl ih theih thei ding a si lo; Mi hmuk pawl ih ruah ban ding khal a si lo.

⁷Mi ṭha lo pawl cu hrampi bangin an kho ding; Thilsual tuahtu pawl cu an ṭhangso zet ding. Asinain annih cu siatsuah ṭheh an si ding.

⁸Ziangahtile BAWIPA nang cu kumkhua in na Cungnungbik a si.

⁹Na ral pawl an thi ding ti kan thei; Mi ṭha lo pawl cu an sung ding ih ṭhekdarh ṭheh an si ding.

¹⁰Nangmah in sele bangin i cakter; Nunnomnak thawn i thluasuah zo a si.

¹¹Ka ral pawl an sun kha ka hmu, Mi ṭha lo pawl an aihram ka thei zo.

¹²Mifel pawl cu tum kung bangin an ṭhang hluarhlo ding; Lebanon ih sidar thing bangin an ṭhang ding.

¹³Anmah cu BAWIPA ih inn sung phunmi thingkung bangtuk an si. Kan Pathian Biakinn sungah an ṭhang ih,

¹⁴An tar hnu khalah rah an rah; A kumkhua in an hring ih an khohzet a si.

¹⁵Himi in BAWIPA cu miding a si, ti a langter. Amah cu ka lungpi a si ih A sungah dingfel lonak zianghman a um lo.