Read Falam Chin SAAM HLABU 94 Bible Online

SAAM HLABU 94 - Falam Chin bible

SAAM HLABU 94

¹Maw BAWIPA, nang cu phuba latu Pathian na si; Na thinhengnak langter aw.

²Nang cu mi hmuahhmuah thuṭhentu na si; Tho awla mi puarthau pawl an sual man pe hai aw.

³Ziangtik tiangso mi ṭha lo pawl hi an lung a awi ding? Maw BAWIPA, ziangtik tiangso?

⁴Thilsual tuahtu hi ziangtik tiangso hngal zet le Puarthau zetin an sualnak hi an aupi hrih ding?

⁵Maw BAWIPA, na minung pawl an palcih hai; Na ta a si mi pawl an hrem hai.

⁶Nuhmei le ngakṭah farah pawl an that ih, Kan ram sungih a ummi mikhual pawl an phil.

⁷Annih in, “BAWIPA cun in hmu lo paam; Israel ih Pathian cun in hliah leem lo,” an ti.

⁸Maw ka minung pawl, ziangtinso hiti lawmmam ih thinlung mal le mi aa nan si? Ziangtikah so nan beng a var ding?

⁹Kan hna a tuahtu Pathian cun, Thei loin a um ding maw? Kan mit a tuahtu Pathian cun, Hmu loin a um ding maw?

¹⁰Miphunkip hotu cun a hrem hai lo ding maw? Mi hmuahhmuah zirhtu cun a thei thluh lo ding maw?

¹¹BAWIPA in milai ih thinlung cu a hmu ṭheh; An ngaihtuahmi zianghman a si lozia khal a thei ṭheh.

¹²Maw BAWIPA, nangmah ih nun na zirh mi le, Na daan na zirhmi pawl cu mi thlawsuak an si.

¹³Mi ṭha lo hrangih thlaan laih a si hlan tiang, Harsatnak ni sungin colhnak na pek a si.

¹⁴BAWIPA in a minung pawl a dungtun lo ding; Amah ih ta a si mi pawl cu a tlansan lo ding.

¹⁵Thuṭhennak hmunah dingthluk lairelnak thawn thuṭhennak a um sal ding ih, Miding hmuahhmuah in an thlun ding.

¹⁶Mi ṭha lo pawl do dingah zoso ka hrangah a ding ding? Mi siava pawl tawng dingah zoso ka lamah a ṭang ding?

¹⁷BAWIPA in i bawm hlah sehla, Daiziar ih umnak ram ah zamrang zetin ka feh zo ding.

¹⁸“Ka rilsawn thlang ding a si hi!” ka ti tikah, Maw BAWIPA, a hmunmi na duhdawtnak in i dingter.

¹⁹Thinphang le donhar ih ka um tikah, Nangmah in i hneem ih ka lung i awiter.

²⁰Nang cu nawhthuh laak ih thuṭhentu pawl, A dik lomi khi a dik tiah a titu pawl,

²¹Mi ṭha a phiartu pawl le sual nei lomi thah dingih thu a ṭhentu pawl thawn Nan ṭang tlang lo a si.

²²Asinain BAWIPA in i ṭan ih, Ka Pathian cu ka beunak lungpi a si.

²³An siatvaat manah Pathian in a hrem hai ding ih, An sual manah a siatsuah ṭheh hai ding. BAWIPA kan Pathian in a tisiat hai ding a si.