Read Falam Chin SAAM HLABU 96 Bible Online

SAAM HLABU 96 - Falam Chin bible

SAAM HLABU 96

¹BAWIPA ih hnenah hla thar sa uh! Leilung pumpi in BAWIPA ih hnenah hla sa uh.

²BAWIPA ih hnenah hla sak uhla a hmin cu thangṭhat uh. Nitinten in rundamnak thuthang ṭha sim uh.

³Miphun hmuahhmuah hnenah a sunlawi zia than uhla, Mi hmuahhmuah hnenah thil a ti thei zia cu phuang uh.

⁴BAWIPA cu a tum ih a saang bik ah thangṭhat ding a si. Khawzing dang hmuahhmuah hnakin ṭih sawn ding a si.

⁵Miphun dang pawl ih khawzing tla cu milem an si; Asinain BAWIPA cu van ih ummi hmuahhmuah tuahtu a si.

⁶Sunlawinak le hminthannak cu a kimvel ah an um; Huham le mawinak cu a Biakinn sungah an um.

⁷Leilungtlun mi hmuahhmuah tla, BAWIPA cawimawi uh; A sunlawinak le a cahnak thangṭhat uh.

⁸BAWIPA ih hmin sunglawi cu thangṭhat uh; Thawinak kengin a Biakinn ah ra uh.

⁹Thianghlim Bik Amah a lang tikah a hmaiah kuun uh. Leilung pumpi cu a hmaiah khur seh.

¹⁰Miphun hmuahhmuah hnenah, “BAWIPA cu siangpahrang a si; Leilung cu a umnak ah hngette in a um zo ih, ṭhawn theih a si nawn lo. Mi hmuahhmuah cu dingthluk lairelnak thawn an thu a ṭhen sak ding,” tiah sim uh.

¹¹Maw lei le van, nan lungawi uh! Tifinriat le a sungih ummi pawl tla au uh!

¹²Lo le a sungih ummi pawl tla, nan aipuang uh! Tupi sungih thingkung pawl khal BAWIPA ih hmaiah lungawi in hla sak uh.

¹³Ziangahtile leilung uk dingah BAWIPA cu a ra; Leilungtlun mi hmuahhmuah cu dingthluk lairelnak le felnak thawn a uk hai ding.