Read Falam Chin SAAM HLABU 97 Bible Online

SAAM HLABU 97 - Falam Chin bible

SAAM HLABU 97

¹BAWIPA cu siangpahrang a si! Leilung hi lungawi in um seh! Maw tifinriat ih um tikulh pawl, nan aipuang uh!

²Khawdur le khawthim cu a kimvel ah an um; A tokham cu dingfelnak le dingthluk lairelnak parah a ṭoh.

³A hmai ah meisa a feh; A kiangkap ih um a ral pawl a kaang ṭheh hai.

⁴A nimthlakau in leilung pumpi a vaangter; Cumi cu leilung in a hmu ih a khur.

⁵BAWIPA ih hmaiah tlang pawl cu khuailul bangin an zup; Leilung pumpi ih BAWIPA ih hmaika ahcun!

⁶Van pawl in a dingnak thu an phuang ih, Mi hmuahhmuah in a sunlawinak huham an hmu.

⁷Milem a biatu pawl cu ningzak in an um; Milem a porh rerotu pawl cu! Khawzing hmuahhmuah in BAWIPA ih hmaiah an kuun a si.

⁸Maw BAWIPA, na thuṭhennak ruangah Zion mi pawl cu an lung a awi ih, Judah khawpi pawl cu an thin a nuam.

⁹Maw Ziangkimtithei BAWIPA, Nang cu leilung pumpi uktu na si. Khawzing hmuahhmuah hnakin na tum sawn.

¹⁰BAWIPA in thil ṭha lo a huatu pawl cu a duhdawt; A minung pawl ih nunnak cu a hum, Mi ṭha lo pawl ih kut sungin a run hai a si.

¹¹Miding parah tleunak a thleng; Mi ṭha parah lungawinak a thleng.

¹²Nannih miding pawl, nan lungawi uh; BAWIPA ih thil tuahmi ruangah cun; Thianghlim bik Amah ih a tuahmi cu ciing ringring uhla, A hnenah lungawinak pe uh.