Read Falam Chin SAAM HLABU 98 Bible Online

SAAM HLABU 98 - Falam Chin bible

SAAM HLABU 98

¹[84] BAWIPA ih hnenah hla thar sa uh; Mangbangza thil pawl a tuah zo. A huham le a baan thianghlim in Ral a neh ṭheh zo.

²BAWIPA in a ral neh thu cu a than; Mi a run theinak huham cu miphun kip hnenah a theihter zo a si.

³Israel mi parih a thukammi a kimter; An parah a hmunmi a duhdawtnak le a tlaihsannak cu cat loin a hmunter a si. Vanrang thuai mi hmuahhmuah in Kan Pathian ih ral nehnak cu an hmu ṭheh.

⁴Maw leilung mi pawl, BAWIPA ih hnenah lungawinak hla sa uh. Amah cawimawinak hla sak uhla lungawi in au uh.

⁵Tingrisit thawn BAWIPA ih hnenah thangṭhatnak hla sa uh. Lemlawi thawn hla mawi tum uh.

⁶Tawtawrawt le tuucang ki thawn, Siangpahrang kan BAWIPA ih hmaiah lungawi aipuang in au uh.

⁷Maw tifinriat le a sungih ummi pawl, au ciamco uh; Maw leilung le a parih ummi pawl, hla sa uh.

⁸Maw tipithuanthum pawl, nan zaa beeng cio uh; Maw tlang pawl BAWIPA ih hmai ah lungawinak hla sa tlang uh.

⁹Ziangahtile leilung uk dingah BAWIPA cu a ra a si; Amah in leilung pumpi ih minung hmuahhmuah cu, Dingthluk lairelnak le felnak thawn a uk ding a si.