Read Falam Chin THUFIM 12 Bible Online

THUFIM 12 - Falam Chin bible

THUFIM 12

¹Fimnak a duhtu pawl cun an sual tikah nunsim an duh. Nunsimnak a huatu cu mi aa an si.

²BAWIPA in mi ṭha pawl cu a lawm; Asinain ṭhat lonak khua a khangtu pawl cu a hnong.

³Ṭhat lonak in mi a humhim lo; Asinain miding pawl cu hngetzet in an ding.

⁴Nupi ṭha cu a pasal ih sui lukhuh a si; Asinain a pasal tlun ih ningzahnak a thlentertu nupi cu, a pasal ruh sungih khensar natnak vek a si.

⁵Miding cun tluang zetin mi an kom, Mi ṭha lo pawl cun mi bum ding lawng an duh.

⁶Mi ṭha lo pawl ih ṭongkam cu mi thahnak thu a si; Asinain miding pawl ih ṭongkam in mi a runsuak.

⁷Mi ṭha lo pawl cu thihnak an tong ih an ci a mit; Asinain miding innsungsaang pawl cu an santluan in a ṭha.

⁸Mifim na si ahcun mi in an lo lawm ding; Mi aa na si ahcun mi in an lo hmuhsuam ding.

⁹Mah ih nunnak hrang hna a ṭuan rerotu mizaraan si cu, Mi thupi zet vekin um ih rilrawn hnakin a ṭha deuh.

¹⁰Mi ṭha pawl in an ṭilva an fingkhawi; Asinain mi ṭha lo pawl cun an ṭilva zaangfahnak an nei lo.

¹¹A law-mi lothlo pa in ei ding tampi a nei; Asinain a ṭhathnem lomi hnaṭuan ih caan cemtertu cu mi aa an si.

¹²Mi ṭha lo pawl ih duhmi cu thil ṭha lo tuah ding hawl khi a si. Asinain miding pawl ih hrihram cu fektein a ding.

¹³Mi ṭha lo cu amah ih ṭongkam in a awk aw; Asinain mi ṭha cu harnak ihsin amahte a luat awter.

¹⁴Na simmi le na tuahmi parah na covo a um; Nangmah ih tawkzawn in na ngah ding.

¹⁵Mi aa pawl in miding kan si tiah an ruat aw ringring ṭheu; Mifim pawl cun ruahnak pekmi an ngai.

¹⁶Mi aa cun a thinhennak zamrangin a langter; Mifim cun mi ih zomtaihnak hman daitein a um san.

¹⁷Thudik na simnak in felnak a langter; Asinain thuphan in fel lonak lamah a hruai.

¹⁸Ruahnak nei cuca lo ṭongkam cun nam vekin thuk zetin mi a sun; Asinain mifim ih ṭongkam in hma a damter.

¹⁹Thuphan in nunnak caan tawite a nei; Asinain thudik cu kumkhua in a nung.

²⁰Ṭhat lonak thil a ngaituahtu cu amah le amah a bum aw; Asinain daihnak remreltu pawl hnenah lungawinak a um.

²¹Miding pawl hnenah thil ṭha lo a thleng lo; Asinain mi ṭha lo pawl cun harnak lawnglawng an tong.

²²BAWIPA in thuphan pertu pawl a hua; Asinain miding rintlak pawl cu a lawm.

²³Mifim pawl cu an theihmi thu khalah dai tein an um; Asinain mi aa pawl cun an aatnak kha an langter ṭheu.

²⁴Hnaṭuan taimaknak in uknak huham a lo pe ding ih, Zaangzelnak in sal ah a lo canter ding.

²⁵Donharnak in na lungawinak a dawi hlo ding; Asinain zaangfahnak ṭongkam in thazaang a lo pe ding.

²⁶Miding pa cu a rualpi ih lamhruaitu a si; Asinain mi ṭha lo pa ih lamzin in rualpi pawl lam a pialter.

²⁷Mi zaangzel pawl cun ram an toih hmanah sakahmi an nei lo; Asinain mi taima pawl cun thil man sunglawi bik an khawm.

²⁸Dingnak cu nunnak lampi a si ih, ṭhat lonak cu thihnak lampi a si.