Read Falam Chin THUFIM 13 Bible Online

THUFIM 13 - Falam Chin bible

THUFIM 13

¹Fapa fim cu a pa in nun a sim tikah a ngai; Asinain mi hngal cun ka sual ngai a ti dah lo.

²Mi ṭha cun an ṭongkam ih rah an ei ding; Asinain mibum hmang pawl cun ṭhat lonak lawng an hiar.

³Na simmi ralring awla na nunnak kha humhim a si ding; Ralring loih a ṭongtu cun amah le amah a siatsuah aw.

⁴Mi zaangzel cun thil tampi a duh zet ṭheu; Asinain zianghman a ngah cuang lo; Hnaṭuan zetmi cun a duh mi pohpoh a ngah ding.

⁵Miding pawl in thudik lo an hua, Asinain mi ṭha lo ṭongkam pawl cu ningzakza le fihnungza a si.

⁶Dingnak in sualnak nei lo pawl a humhim; ṭhat lonak cu misual pawl ih tluknak a si.

⁷Mi hrekkhat pawl cu milian vekin an um; Asinain zianghman an nei lo; Mi hrekkhat cu farah vekin an um, Asinain thilri tampi an nei.

⁸Milian in an nunnak tlennak ah paisa hman ding an nei; Asinain mi farah cu zohman in an hringhro lo.

⁹Miding pawl ih tleunak cu a tleu cuang a bang; Mi ṭha lo pawl ih meikhuat cu a mit cing ding.

¹⁰Puarthaunak cun harsatnak lawng a suahter; Mi dang ruahnak thuron cu fimdeuhnak a si.

¹¹Ol-ai deuh ih na ngahmi lennak cu, A rei hlanah a hlo vivo ding; Harsazet ih na hlawhmi cu rei a daih ding.

¹²Ruahsannak ngah lohli lo tikah thinlung a na; Asinain saduhthah mi a kim tikah nunnak cu lungawinak in a khat.

¹³Nunsimnak thu zianghman a siar lotu pawl cu anmah le anmah an siat awter ding; Nunsimnak thu a thlun mi pawl cu an him ding a si.

¹⁴Mifim mi pawl ih zirhnak cu nunnak cerhti a si; Cu pawl in na nunnak cu ṭihphannak sungih a um tikah, an luatter ding.

¹⁵Fimthiamnak in upatnak a hlawh, Asinain zumtlak a si lomi pawl cu siatnak lamzin ah an feh.

¹⁶Mifim pawl cu thil an tuah hlanah khua an ruatta ṭheu; Asinain mi aa pawl cun an aatnak sawn an phuang.

¹⁷Rinsan tlak lo tlang-autu pawl in harnak an suahter; Asinain zumtlakmi palai pawl in daihnak an suahpi.

¹⁸Nunsimnak ngai duh lo cu farahnak le mualphonak a si; Asinain nunsimnak a ngaitu cu upatnak an co ding.

¹⁹Saduhthah mi ngah hi ziangtluk in a ṭha; Mi aa pawl cun ṭhat lonak ihsin kirsal ding an duh lo.

²⁰Mifim pawl thawn umtlang awla na fim ding; Mi aa na pawl a si ahcun harnak na tong ding.

²¹Misual pawl cu harsatnak in hmunzakip ah a thlun; Asinain miding pawl cu ṭhatnak laksawng an co ding.

²²Mi ṭha in a tu le a fa tiangin a lennak a roh ding; Asinain misual pawl ih lennak cu miding pawl kutah a thleng ding.

²³Thlawh lomi loram ihsin farah hrangah rawl tampi a suah ding; Asinain dingthluk lairelnak a um lo ruangah a suakmi rawl hman an sung lam ding.

²⁴Na fapa na hrem lo ahcun amah na duhdaw lo a si; Na duhdawt a si ahcun nun na sim ding.

²⁵Miding pawl in eikhop rawl an nei; Asinain mi ṭha lo pawl cu kumkhua in an ril a rawng.