Read Falam Chin THUFIM 14 Bible Online

THUFIM 14 - Falam Chin bible

THUFIM 14

¹Nunau fim pawl in an inn an sak; Asinain a aa pawl in anmah kut lala in an balsiat.

²Miding pawl in BAWIPA an ṭihzah; Asinain mi hrokhrawl pawl cun ziangah an siar lo.

³Mi aa hngal in tamtuk an ṭong ih, Mifim pa ih ṭongkam in amah kha a humhim.

⁴Hnaṭuantu ding cawcang pawl an um lo ahcun, na cuam cu a lawng ding; Asinain cawcang pawl ih thazaang in rawl tampi a suah ding.

⁵Rintlak mi thutheitu in thudik a sim ṭheu; Asinain rintlak lomi cun thuphan lawnglawng a sim.

⁶Mi puarthau pawl cu mifim an cang thei dah lo; Asinain mifim pawl cun ol ngaiten thu an zir.

⁷Mi aa pawl kiangkap ah um hlah; Nangmah lo zirh ding zianghman an nei lo.

⁸Ziangruangah mifim cu a fim? Ziang ka tuah ding ti a theih ruangah a fim. Ziangruangah mi aa cu a aat? Ka thei a si tiah a ruah awk ruangah a aa.

⁹Mi aa pawl cu an sual khalah sual sir awk ti an thei lo. Asinain miding cun ngaihthiam mi si ding kha an duh.

¹⁰Na lungawinak cu nangmah ih ta a si; Na riahsiatnak khal nangmah ih ta a si; Zohman in an lo ṭawmpi thei lo ding.

¹¹Mi ṭha lo pa ih inn a siat ṭheh hnu hmanah, Mi ṭha pa ih deu cu a fek ringring hrih ding.

¹²Mihrek in lamzin dik tiih an ruahmi A netnak ah thihnak ih mi hruaitu lamzin a um.

¹³Hnih-nak aw in riahsiatnak aw a thup thei; Sikhalsehla lungawinak a cem tikah, Riahsiatnak cu a taang ringring ding.

¹⁴Mi ṭha lo in an ṭhat lo man an ngah ding ih, Mi ṭha in an ṭhat man an ngah ding.

¹⁵Ruahnak mal pawl in ziang hmuahhmuah an zum; Mifim pawl cun an fehnak kha ṭhatein an zohta ṭheu.

¹⁶Mifim pawl cu ralring tein an um ih ṭhat lonak kha an hrial; Asinain mi aa cun ralrinnak nei loin zamrang tukin an tuah ṭheu.

¹⁷Mi thintawi pawl cu at-hlawh zetin thil an tuah; Asinain mifim deuh pawl cu tangdorte in an um.

¹⁸Ruahnak mal pawl cu aat man an ngah ding; Asinain mifim cun an fim man ah fimthiamnak an co ding.

¹⁹Mi ṭha lo pawl cu mi ṭha pawl hmaiah an kun ih, Mithmai ṭha ngah dingin zaangfah an dil.

²⁰Mifarah pawl cu an innhnen hman in an hrial; Asinain milian pawl cu rualpi tampi an nei.

²¹Mi lungawi si na duh ahcun, mi farah va zaangfah aw; Midang hmuhsuam cu sualnak a si.

²²Ṭhatnak hrang lawng khua na khan ahcun, Mi in an lo zum ding ih an lo upat ding. Asinain ṭhat lonak hrang khuakhan cu palhnak a si.

²³Hnaṭuan khung ṭuan awla na cawm aw thei ding; To men ih ṭong rero cu farahnak a si.

²⁴Mifim pawl cu lennak laksawng pek an si ding; Asinain mi aa pawl cu an aatnak in theih thei an si.

²⁵Thudik simtu thutheitu cun nunnak a humhim ding; Asinain thuphan a pertu cu mi zuartu a si.

²⁶Pathian ṭihzahnak in mi pakhat le a innsang hnenah, mah le mah rinsan awknak le humhimnak a pek.

²⁷Thihnak in luat na duh maw? BAWIPA ṭihzah cu nunnak cerhti a si.

²⁸Siangpahrang ih hu le thawm cu, a ukmi tam le mal parah a um; A ukmi an um lo ahcun amah lawng cu zianghman a si lo.

²⁹Thinsau mi cu mifim a si; Asinain na thin a tawi ahcun na aatnak kha na langter.

³⁰Thindaihnak in pumsa a damter; Asinain iksiiknak cu ruh hrangah khensar natnak vek a si.

³¹Mi farah pawl na hrem ahcun, mi farah pawl sersiamtu Pathian na nautat a si; Asinain farah pawl zaangfahtu cu Pathian ṭihzahtu a si.

³²Mi ṭha lo pawl cu anmah ih tuahmi ṭhatlonak in siatnak a thlenpi; Asinain mi ṭha pawl cu anmah ih felnak in a humhim.

³³Fimnak cu mifim pawl ih lung sungah a um ih, Mi aa pawl ih lung sungah cun umnak hmun a nei lo.

³⁴Dingnak in miphun a cawisaang; Sualnak cun miphun mual a photer.

³⁵Siangpahrang in a felmi a hnaṭuantu pawl a lawm; Asinain a fel lomi hnaṭuantu pawl cu a hrem.