Read Falam Chin THUFIM 15 Bible Online

THUFIM 15 - Falam Chin bible

THUFIM 15

¹Awkaa neem ih thulehnak in thinhengnak a daiter; Asinain ṭong hrang in thinhengnak a suahter sin.

²Mifim pawl ih lei in fimnak a karhter, Mi aa pawl ih kaa in aatnak a suahter.

³BAWIPA in hmunkipih a cangmi thil hmuahhmuah a hmu ṭheh; ṭhatnak kan tuah ah siseh, siatnak kan tuah ah siseh, in zoh ringring a si.

⁴Zaangfahnak ṭongkam in thinlung a nungter sal; Asinain zaangfahnak um lo ṭongkam cun thinlung a kuaiter.

⁵Pa ih nunsimnak a eltu cu mi aa an si; Nunsimnak a saangtu cu mifim an si.

⁶Miding in an sumsaw an khawl; Asinain mi ṭha lo cun harnak a thlen tikah an rak hmang ral zo.

⁷Mifim pawl ruangah fimnak a karhzai; Mi aa pawl ruangih karhzai a si lo.

⁸Mi ṭha pawl thla an cam tikah BAWIPA a lung a awi; Asinain mi ṭha lo pawl ih an kenmi raithawinak cu a fih.

⁹Mi ṭha lo pawl ih thil tuahzia cu BAWIPA in a hua; Asinain dingnak a tuahtu pawl cu a duhdawt.

¹⁰Thil sual na tuah ahcun nazet ih hremnak na tuar ding; Nunsimnak na duh lo ahcun na thi ding.

¹¹Mithi khua Sheol le hngilhnak ram sungih a ummi pawl khal khi BAWIPA in a hmu ṭheh; Ziangtin so minung in an ruahnak kha Pathian hmai ihsin an thuh thiam ding?

¹²Mi hngal pawl cun nunsim an duh lo; A fim deuh pawl hnen ihsin ruahnak khal an dil dah lo.

¹³Minung cu an lungawi tikah an mithmai a ṭha; Asinain an riahsiat tikah an thin a nau.

¹⁴Mifim pawl cun zir ding an duh; Asinain mi aa pawl cu an aatnak ah khan an lung a kim ko.

¹⁵Mifarah pawl cu lungrethei ringring in an um; Milungawi pawl cu an nun a nuam ringring.

¹⁶BAWIPA ṭihphah ih malte neih hi, lian ih thinphang rero hnakin a ṭha sawn.

¹⁷Duhdawtmi pawl thawn hanghnah hangrah ei cu, Huatawknak hmun ih sa thaw bik ei hnakin a thaw deuh.

¹⁸Thintawinak in tawhawknak a suahter; Asinain thinsaunak in remnak a thlenter.

¹⁹Mizaangzel na si ahcun hmunkipah harnak na tong ding; Miding na si ahcun harsatnak na nei lo ding.

²⁰Fapa fim in a pa ih lung a awiter; Mi aa lawngin a nu kha a hmuhsuam.

²¹Mi aa pawl cu anmah ih aatnak ah an thin a nuam; Asinain mifim cun dingnak kha a tuah ding.

²²Ruahnak tam deuh na lak tik poh ah na hlawhtling ding; Cu lo ahcun na hlawhsam ringring ko ding.

²³A caan thawn a remmi ṭongkam ṭong ngah cu, ziangtlukin so a ṭhat.

²⁴Mifim cu thihnak lam ah vung feh loin, nunnak lamzin ah a hung feh.

²⁵BAWIPA in mihngal pawl ih inn cu a siatbal ding; Asinain nuhmei nu ih thilri kha a kilveng ding a si.

²⁶BAWIPA in ruahnak ṭha lo pawl cu a hua; Asinain rem awknak ṭongkam ah a lung a awi.

²⁷Dik lozet ih hlawknak ngah na tum ahcun, Na innsang na buaiter ding. Nawhthuh lak hlah awla na san a sau ding.

²⁸Mi ṭha pawl cun thu leh hlanah an ruat hmaisa ṭheu; Mi ṭha lo pawl cun zamrang in an let ih buainak an suahter.

²⁹Mi ṭha pawl thla an cam tikah BAWIPA in a ngai; Asinain mi ṭha lo pawl ih thlacamnak cu a hnong.

³⁰Mithmai ṭha in mi lung a awiter, Cule thuthang ṭha cun ruh sung tiangin damnak a pek.

³¹Nunsimnak ṭhatein na ngai ahcun mifim na si.

³²Zir ding na el ahcun nangmah le nangmah na hmuhsuam aw a si. Nunsimnak na saan ahcun na fim deuh ding.

³³BAWIPA ṭihzah hi fim zirnak a si. Upatnak na co theinak dingah tangdor hmaisa aw.