Read Falam Chin THUFIM 17 Bible Online

THUFIM 17 - Falam Chin bible

THUFIM 17

¹Rem-awklonak inn ih puai zawh hnakin, Thinlung hnadaite ih buhṭhing tlangkhat ei a ṭha sawn.

²A fim zetmi sal cu a bawipa ih fapa santlai lomi tlunah, Thuneihnak a ngah ding ih ro ṭhen khat a co ve ding.

³Sui le ngun cu meisa in hniksak an si; Minung thinlung cu BAWIPA in a hniksak.

⁴Mi ṭha lo pawl cun ruahnak ṭha lo an thlun ih, thuphanpertu pawl in thuphan thu kha an ngai.

⁵Mifarah na zawmtai a si ahcun a sersiamtu Pathian na zawmtai a si; Mi in vansiatnak an ton tikah na di a riam ahcun hrem na si ding.

⁶Tar pawl ih bawi lukhuh cu an tu le fa pawl an si; Nauhak pawl ih sunlawinak cu an nu le pa an si.

⁷Upat tlakmi pawl in thuphan an sim lo; Mi aa pawl cun a remcaan laiah simrel ding an thei lo.

⁸Mi hrekkhat pawl in nawhthuh cu mitkher vekin hna a ṭuan thei ding tiin an ruat; Ziang hmuahhmuah a tuah thei tiah an zum.

⁹Mi in nangmah a lo duhdawt ding na duh a si ahcun, An sual tikah va ngaithiam aw; Sualpalhnak ciin ringringnak in rualpi a ṭhen thei.

¹⁰Mi aa voi zakhat thawi hnakin, Mifim voi khat kawk a luut thuuk sawn.

¹¹Harnak a suakter ringringtu mi ṭha lo pawl hnenah, Thihnak kha zualkotu bangin thlah a si ding.

¹²A fa lonsak mi vompi ton hi, Mi aa buai rero lai ton hnakin a ṭha deuh.

¹³Ṭhatnak kha ṭhat lonak ih a lehrultu cu, ṭhat lonak khan a inn ihsin a suahsan lo ding.

¹⁴Tawhawknak hramthok cu tidai khamtu kuai hramthok vek a si; Sualawknak a um hlanah baang aw.

¹⁵Sualnak nei lo mawhthluk le mi ṭha lo thiam coter hi, An pahnih in BAWIPA ih huat zawng a si.

¹⁶Mi aa fim zirhnak hrangih tangka tampi cem hi ziangso a ṭhahnem? Ziangahtile a fim cuang lo ding; Fim theinak thinlung a nei lo.

¹⁷Rualpi ṭha in duhdawtnak an langter ringring; Harsatnak caanih kan bawm-awk lo ah unau si man ziangso a um?

¹⁸Khawruahnak nei lo mi aa lawng in mi dang ih leiba hrangah, ṭuanvo lakin thu a kam aw.

¹⁹Sualnak duh cu harsatnak tuah duh thawn a bang; Na uar awk rero ahcun harsatnak na sawm thawn a bang.

²⁰Thinlung ṭha lo minung cu a lamzin a tluang lo; Mibum hmang lei cu siatralnak sungah a tla.

²¹Fapa aa cun riahsiatnak a suahter; Fapa aa a neitu cu lungawinak a nei lo.

²²Lungawinak hi sii ṭhazet a si. Thinharnak in ruh a roter.

²³Thuṭhentu misual pawl cun, Nawhthuh an lak thup ih dingthluk lairelnak a um thei lo.

²⁴Mifim pawl cun thil ṭha tuah ding an thei; Asinain mi aa pawl cu an thinlung a vaangza.

²⁵Fapa aa in pa ih hnenah thinharnak a thlenter ih, A nu ih hnenah lungretheihnak a thlenter.

²⁶Sualnak nei lomi hrem cu a dik lo; Mi ṭha pawl vuak cu a sia sinsin.

²⁷Mifim pawl in tampi an ṭong lem lo; Daite in a ummi cu thildik hmu theitu an si.

²⁸Mi aa hman daitein a um ahcun, mifim ah ruah a si; A kaa a ciip ahcun, mifim bangtuk a si.