Read Falam Chin THUFIM 18 Bible Online

THUFIM 18 - Falam Chin bible

THUFIM 18

¹Midang thawn a pawlkom aw thei hrimhrim lomi cu, Mah ih duhnak lawng ruattu an si. Midang ruahnak cu a pom thei dah lo.

²Mi aa cun thu a theih le theih lo kha thupi ah a ruat lo; Ziangtluk ka fim ti langter ding lawng a duh.

³Sualnak le ningzah mualphonak cu an feh tlang ringring; Upatnak na hlohter ahcun a ai ah hmuhsuamnak na ngah ding.

⁴Minung ṭongkam hi fimnak hram a si thei; Tipithuanthum vekin a thuk thei ih, A luang ringring mi tiva vekin a thar ringring thei.

⁵Mi ṭha lo pawl mithmaiṭha pek cu a dik lomi a si; Miding thiamlo coter khal a dik lomi a si.

⁶Mi aa hmur in tawhawknak a suak; Cun a kaa in vuakvelhnak a sawm.

⁷Mi aa a ṭong tikah amah le amah a siatsuah aw rero; A ṭongmi in amah le amah a awk aw.

⁸Mi relsiatnak thu cu a thaw nasa; A thlum zet ih kan dolh hluahhlo.

⁹Mi zaangzel cu mi siatsuahtu tluk ih sia a si.

¹⁰BAWIPA cu a hngetmi beunak inn donhleisang a si; Miding pawl cu cutawkah an feh ih an him.

¹¹Milian pawl in an sumsaw kha himnak ah an ruat; A saang ih a fek zetmi khawpi kulhnak hauhruang ah an ruat.

¹²Zokhal tangdornak a neih hlan lo cu upatnak pek a si dah lo; Mi hngal pawl cu siatnak lamzin ah an um.

¹³Thu na leh hlanah ṭhatein ngai hmaisata aw; Cutin na tuah lole mi aa na si ih hlei ah thu na leh mi kha na hmuhsuam a si.

¹⁴Minung thinlung in natnak a tuar thei; Sikhalsehla zoso thinlung kuai cu a tuar thei?

¹⁵Mifim pawl cu zir duhnak thinlung an nei ringring.

¹⁶Mi thupi mi ton na duh maw? Thil ṭhen ding keng awla olte in na tong thei ding.

¹⁷Thuṭhennak zungah thu a sim hmaisa biktu cu mi dik bik a bang; Sikhalsehla cutiih a bangnak cu amah a eltupa in thu a sut ih a hlathlai ciamco tik tiang lawng a daih.

¹⁸Thutheizet veve pahnih thuṭhennak zungah thu an el awk ahcun, Camcawhfung lawngin an thu a ṭhen thei.

¹⁹Na unau bawm awla anih in a fekmi khawpi hauhruang vekin a lo hum ding; Asinain na tawh a si ahcun na hrangah a sangka a khar ding.

²⁰Na ṭong ih a suahtermi rah in na pum a lo puarter ding; Na hmur ihsin a suakmi in na lung a lo kimter ding.

²¹Na ṭongkam in na nunnak a himter thei vekin siatnak khalah a siatter thei; Curuangah na ṭongkam ruangih a ra thlengmi thil pawl cu na tuar thei a ṭul.

²²Nupi ton cu thil ṭha ton a si; Cumi in BAWIPA ih ṭhatnak na parah a langter.

²³Mifarah a ṭong tikah a dil tein a dil ṭheu; Sikhalsehla milian pa cun awkaa hrang in mi a let.

²⁴Rualpi hrekkhat cu caan tawite sung lawng an hmun; Sikhalsehla rualpi ṭhenkhat cu unau hnakin mi an tlaihsan sawn.