Read Falam Chin THUFIM 19 Bible Online

THUFIM 19 - Falam Chin bible

THUFIM 19

¹A dingmi mifarah si cu a hrokhrawlmi mi aa hnakin a ṭha deuh.

²Theihnak um lo ih a duh lawng duh cu a ṭha lo; Thinsaunak um lo cun harnak ton a olte.

³Minung in mah ih aatnak ruangah siatralnak an tong ṭheu; Cutikah BAWIPA an mawhthluk.

⁴Lennak in rualpi thar tampi a suahter; Sikhalsehla mifarah cu a rualpi cia hman in an tlansan ṭheu.

⁵Thuṭhennak zungah thuphan na sim asile, Cawhkuan na tong ding, na luatnak a um lo.

⁶Mitampi in mi thupi pawl hnenin mithmaiṭha ngah an zuam; Mi tirhsiang hrang ahcun zokhal rualpi ṭha an si ṭheh.

⁷Mifarah cu a suahpi unau hman in an hnong ṭheu; Theihthiam mi rualpi menmen pawl cun ziangtlukin so an tlansan sinsin ding! Ziangtluk ih a kawh hai rero khalle an kir nawn lo.

⁸Nangmah le nangmah duhdaw awla, Fimnak kha na zir thei tawkin zir aw; Na zirmi kha ciing ringring awla, Na thil tuahmi ah na hlawhtling ding.

⁹A dik lomi thutheitu cu hremnak in a luat lo ding; Thuphan a simtu cu a siatral ding.

¹⁰Mi aa cu nunnuam zetin nung dingah a tlak lo; Sal ih bawi uk ding cu a tlak lo sinsin.

¹¹Na fim asile na thinlung na uk thei ding, Mi ih sualnak ngaithiam cu thil sunglawi a si.

¹²Siangpahrang thinhengnak cu kiosa huuk bangtuk a si; Sikhalsehla a zaangfahnak cu hrampi parih tladai bangtuk a si.

¹³Fapa aa in siatralnak ah a pa a thlenpi; A phunzai ringringmi nupi cu catbaang loin a surmi ruah bangtuk a si.

¹⁴Inn le sumsaw cu nu le pa hnenih ngahmi rothil an si; Sikhalsehla nupi fim cu BAWIPA ih hnen ihsin ngahmi a si.

¹⁵Zaangzel in na it ringring men asile, na ril a rawng ding.

¹⁶Pathian thukham thlun awla na nunkhua a sau ding; Ziangsiar loin na um asile na thi ding.

¹⁷Mi farah parih zaangfahnak neih cu BAWIPA ih hnen ih thil pek bangtuk a si; BAWIPA amah in a lo pe sal leh ding.

¹⁸Na faale kha an no laiah nun sim aw; Na sim lo asile anmah le anmah siatsuah aw dingin na bawm a si.

¹⁹Nasa zetih thinhengtu cu hremnak a tong ding; Harnak sungin voi khat run hman awla na run sal a ṭul thotho ding.

²⁰Ruahnak pekmi kha na ngai ih zirnak na neih asile, Nikhat khat ahcun mifim na si ding.

²¹Minung cun a thinlung in khaw- khannak tampi a nei ko ding; Sikhalsehla BAWIPA ih khawkhannak lawng tuah a si ding.

²²Duhham hi ningzahnak a si; Mifarah si hi thuphanpertu si hnakin a ṭha deuh.

²³BAWIPA ṭihzah awla na nunkhua a sau ding; Siatralnak tong loin na him ding ih na hna a ngam ding.

²⁴Mihrek cu an zaang a zel tukih, An kaa sungih rawl baar ding hman an zuam lo.

²⁵Mi puarthau hrem awla, ruahnak mal in fimnak a ngah ding; Mifim na si ahcun nunsimnak ihsin fim na zir ding.

²⁶A pa a thawi ih a nu kha inn ihsin a dawitu fapa cu, Ningzahnak le mualphonak a suah tertu a si.

²⁷Ka fapa, zirnak na bansan ahcun na theih ciami kha na hngilh sal ding.

²⁸Midang siatnak lawng a ruattu thutheihpitu hnenah cun dingnak a um lo; Mi ṭha lo pawl in sualnak tuah an duh.

²⁹Mi hngal pawl cu thawi an tong ding. Mi aa pawl cu vuak an hlawh ding a si.