Read Falam Chin THUFIM 2 Bible Online

THUFIM 2 - Falam Chin bible

THUFIM 2

¹Ka fapa, ka lo simmi hi zir awla, Tuah dingih ka lo simmi kha na thinlung ah khum aw.

²Fimnak hi ziang a si ti kha ngai awla, Theithiam dingin na thinlung thawn zuam aw.

³A si, hmuhnak le theihnak kha na ko ih, Theihthiamnak khal na dil ahcun;

⁴Ngun bangin ngah na duh ih, Hlawnthil thuh mi bangin na hawl ahcun,

⁵Cutin na tuah asile Bawipa ṭihzah cu ziang a si ti na thei ding ih, Pathian theihnak cu na hmu suak ding a si.

⁶Fimnak petu cu Bawipa a si ih, Amah ih hnen ihsin fimthiamnak le theihthiamnak an ngah a si.

⁷Miding pawl le mi thinlung tluang pawl cu A bawm ih a humhim a si.

⁸Midang parah thuding a tuahtu pawl a humhim ih Amah a duhdawtu pawl kha a kilveng a si.

⁹Ka thu na ngai a si ahcun a dikmi, a ṭha mi le Ka tuah ding mi ziang a si ti kha na thei thei ding.

¹⁰Fimnak na lung sungah a lut ding ih, Na theihnak in a lo lungawi ter ding.

¹¹Na fimnak le na theih thiamnak khan a lo humhim ding ih,

¹²Thil ṭha lo lakin a lo kham ding. Ṭong ṭha lo a hmangtu pawl lak ihsin a lo kilveng ding.

¹³Cu pawl cun lamthim ih feh dingah lam dik cu an tlansan;

¹⁴Thil ṭha lo tuah kha an duhzawng a si ih, Thilsual tuahnak hmun ah an lung a awi ṭheu.

¹⁵Rinsan tlak lo le zum tlak lomi pawl an si.

¹⁶Ṭongkam naal zet thawn a lo bumtu nunau ṭha lo hnen ihsin a lo run suak ding;

¹⁷Cu nu cu a pasal parah dingnak neilotu le, Pathian hnenih a thukam ziang a siarlotu a si.

¹⁸A inn ah na feh a si ahcun thihnak lamzin ah a fehtu na si.

¹⁹A hnenah a fehtu cu zokhal an kirsal nawn lo. Nunnak lam an tong sal nawn lo.

²⁰Cu a si ruangah miṭha pawl ih lam cu na zawh dingih Miding pawl ih nun bangin na nung ding.

²¹Miding mi le miṭha famkim pawl cu hi leilung ah an um ding.

²²Asinain mi ṭha lo pawl cu cuih ramsung ihsin Pathian in a dawihlo ding ih, Mi hrokhrawl pawl cu phawi hlo an si ding.