Read Falam Chin THUFIM 20 Bible Online

THUFIM 20 - Falam Chin bible

THUFIM 20

¹Zu in cu mi hmuhsuam tonnak a si; ṭongkam a tamter ih tawhawknak a suahter. Zurit cu aat a si.

²A thin a hengmi siangpahrang cu a hruum durdomi kiosa na ṭih vekin ṭih aw; Amah a thin a hengtertu cu mah le mah that-aw bangtuk a si.

³Zovek mi aa khal in tawhawknak cu a suahter thei; Tawhawknak hrial thei cu upat tlak a si.

⁴Lo rih tikcu caan ih lothlawh a zuam lotu mi zaangzel cu, rawl lak tikcu ah rawl khawm ding a nei lo ding.

⁵Minung in a thinlung sungih a neih mi ruahnak cu tikhur thuk sungih tidai bangtuk a si; Sikhalsehla mifim pa in a khaisuak thei ding.

⁶Zokhal in mah ih felnak fingfing an sim cio; Sikhalsehla zoso mifel taktak a tong thei?

⁷Pa cu miding le miṭha a si ahcun, A faale pawl mi vanṭha an si.

⁸Thuṭhennak tokham ih a tomi siangpahrang cun, Thil ṭha lo hmuahhmuah kha a mit in a thleidang thluh thei.

⁹Zoso, “Ka thinlung ka thianter zo, Ka sualnak in ka thiang zo,” a ti thei?

¹⁰BAWIPA in cuai le tahnak dik lo pawl a hua.

¹¹Nauhak khal in a sinak a nuncan daan a thiang le thiang lo, A dik le dik lo kha a tuahnak in a langter ṭheu.

¹²Hmuhnak mit le theihnak hna cu, BAWIPA ih tuahmi an si.

¹³Na tikcu caan ihnak in na cemter asile na farah ding; Hna ṭuan ringring awla rawl tampi na nei ding.

¹⁴Thil leitu in, “A man a tamtuk!” tiah a phunzai ṭheu; Sikhalsehla a lei ih a feh hnuah cun, “Olte in ka lei,” tiah a porh aw ṭheu.

¹⁵Sui tampi a um, lungvar khal tampi a um; Sikhalsehla fimnak ṭongkam cu a man a khung sawnmi a si.

¹⁶Theih dah lomi pa hrangah aamahkhan saktu cu, A thilri aamahkhannak hrangah laksak a si ding.

¹⁷Hrokhrawl in ngahmi rawl cu a thaw; Sikhalsehla rei lo ah a kaa sungah vunnel bangtuk a si ding.

¹⁸Ruahnak ṭha a neimi thawn thu va ron aw; Na thiltuahmi ah na hlawhtling ding. Ṭhatein timtuahta loin ral do hlah.

¹⁹A thupte in mi rel a hmangtu in thuthup kha a phuang ṭheu; Curuangah mi rel a hmangtu kha va kom hlah.

²⁰Na nu le na pa na camsiat asile, Khawthim lakih mei-inn mit bangin na nunnak a cem ding.

²¹Olte ih na ngahmi sumsaw cu na hrangah ṭhathnemnak a mal ve ding.

²²Ṭhat lonak kha ṭhat lonak in lehrul hlah; BAWIPA rinsan awla a lo run ding.

²³A dik lomi cuai le tahnak a hmangtu pawl cu BAWIPA in a hua.

²⁴Kan lamzin ah kan ke kar in hruaitu cu BAWIPA a si; Minung in ziangtinso an fehnak ding lamzin an theih thei ding?

²⁵Pathian hnen thawhlawm pek ding thu na kam hlanah ṭhatein ruat hmaisata aw; Culole neh hnuah na siir aw pang ding.

²⁶A fimmi siangpahrang cun misual kha a hawl ih zaangfah loin a hrem ṭheu.

²⁷BAWIPA in ruahnak le siaṭha thleidan theinak thinlung in pek; Kan thinlung hnen ihsin khuiah so kan relh thei ding?

²⁸Siangpahrang in felnak le ṭhatnak le dingnak thawn, A ram a uk sung hmuah cu a uknak a hnget ding.

²⁹Mino pawl ih sunlawinak cu an thazaang a si; Putar pawl ih mawinak cu an sampar hi a si.

³⁰Thawinak hma kan ton ruangah kan ṭhat lonak a thiang; Vuaknak kan ton ruangah thinlung thianfainak kan ngah.