Read Falam Chin THUFIM 22 Bible Online

THUFIM 22 - Falam Chin bible

THUFIM 22

¹Lennak hnakin hminṭhatnak hril ding a si sawn; Zaangfahnak cu sui le ngun hnakin a ṭha sawn.

²Mifarah le milian an bangawknak zawnte a um; Cumi cu BAWIPA ih sersiammi veve an sinak hi a si.

³Mifim cu harnak a rat kha a hmuh tikah a hrial; Sikhalsehla mi aa cun a pahcih hluahhlo ih neh hnuah a sir aw.

⁴Tangdor in BAWIPA ṭihzah awla, Lennak, upatnak le nunsaunak na ngah ding.

⁵Mi ṭha lo pawl ih lamzin cu hling le thang in a khat; Mah ih nunnak a duhtu cun hlatpi in a hrial ding.

⁶Nauhak kha nundaan dik zirh aw, A tar tiangin cuih lamzin ihsin a pial lo ding.

⁷Mifarah cu milian ih sal a si, Cawitu cu coihtu ih sal a si.

⁸Dinglonak thlaici na tuh asile harsatnak na at ding; Midang pawl na hrem theinak khal a reh ding.

⁹Tirhsiang awla na rawl kha farah pawl hlawm aw; Thlawsuah na ngah ding.

¹⁰Mi puarthau dawihlo uhla buainak a reh ding; Tawhawknak le nautatawknak khal a hlo ding.

¹¹Thinlung thiang a keng ih awkaa thlum a nei mi cun, Siangpahrang a rualpi ah a tuah thei ding.

¹²BAWIPA in thuphan a simtu pawl a dawihlo ih, Thudik a simtu pawl kha himte in a kilveng.

¹³Mi zaangzel cu inn ah a um men, Innleng ka suak asile kiosa in i keuthat ding, a ti.

¹⁴Hlawhhlangnu ih hmurka cu a thukmi khur a si; BAWIPA ih thinhengnak a tuahtu pawl cu cuih khur sungah an tla ding.

¹⁵Nauhak thinlung sungah huatsuahnak a um ringring; Nunsimnak fung cun ṭha deuh in a zirh thei ding.

¹⁶Mah ih lennak duh ruangih mi farah a hremtu le, Milian a tlontu cu a farah ding.

¹⁷Na hna i tun aw, mifim pawl ih thusimmi ka lo zirh ding; Cun ka fimthiamnak na thinlung sungah ciing aw.

¹⁸Na thinlung sungah na ret asile na lung a awi ding; Na hmurka ah ralring cia in an um ding.

¹⁹BAWIPA kha rinsan aw, tiah ka lo duhsak; Curuangah himi thu pawl tuih ni ah ka lo zirhnak cu a si.

²⁰Nangmah ih hrangah thufim sawmthum ka lo ngansak; Hi thufim pawl cu fimnak le ruahnak ṭha thawn a khatmi an si.

²¹Cule hi thufim pawl in thudik a lo theihter ding ih, Nangmah tirh a lo fialtu kha diktein thu na sim thei ding.

²²Mifarah kha a farah ruangah a thil va long hlah, Thuṭhennak zung sung khal ah va hrem hlah.

²³Ziangahtile BAWIPA in an thu a ṭanpi ding ih, Anmah a siatsuahtu pawl ih nunnak kha a siatter ding.

²⁴Thinheng a hmangmi le thintawimi va kom hlah,

²⁵Ziangruangah tile, an nundaan na cawng ngah pang asile, na ṭhin thei nawn lo ding.

²⁶Midang leiba hrangah ṭuanvo laak in thu va kam hlah.

²⁷Na sam thei lo asile na ihkhun hman an lo laksak ding.

²⁸Nan pupa pawl ih an rak tuahcia mi ramri kha ṭhawn hlah.

²⁹A hnaṭuannak ih a thiamzetmi na hmu maw? Amah cu mizaraan hnenah si loin siangpahrang hnenah a ṭuan ding.